ސަރުކާރު ހިންގާ މައި ޕާޓީ، ޕީޕަލްސް ނެޝަނަލް ކޮންގްރެސް (ޕީއެންސީ) ގެ ޖަގަހަ (ޕީއެންސީ ހައުސް) ހުޅުވުމުގެ ރަސްމިއްޔާތު މިރޭ ބާއްވަން އެ ޕާޓީއިން ނިންމައިފިއެވެ.
ޕީއެންސީން ބުނީ ޕީއެންސީ ޖަގަހަ ހުޅުވުމުގެ ރަސްމިއްޔާތު ހޮނިހިރު ދުވަހުގެ ރޭ (މިރޭ) 20:30ގައި ހ. ވެޔޮވިލާ ( އާޓިފިޝަލް ބީޗް ކުރިމަތި)ގައި އޮންނާނެ ކަމަށެވެ.
އަދި ޖަގަހަ ހުޅުވައިދެއްވާނީ ޕްރޮގްރެސިވް ކޮންގްރެސް ކޯލިޝަންގެ ލީޑަރު އަދި ރާއްޖޭގެ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ކަމަށްވެސް ޕީއެންސީން ވަނީ ބުނެފައެވެ.
ޕީއެންސީއިން ވަނީ ޖަގަހަ ހުޅުވުމުގެ ރަސްމިއްޔާތުގައި ބައިވެރިވުމަށް ޕީއެންސީގެ މެމްބަރުން އަދި އެންމެހާ ދިވެހިރައްޔިތުންނަށް ދަޢުވަތު އަރުވައިފައެވެ.
“ޕީއެންސީ ހައުސް” ހަދާފައި ވަނީ ގިނަ އަހަރުތަކެއް ވަންދެން ދިވެހި ރައްޔިތުންގެ ޑިމޮކްރެޓިކް ޕާޓީ (އެމްޑީޕީ) އިން މާލޭގައި ހިންގަމުން އައި މައި ހަރުގެ އަދި ފަހުން އެ ޕާޓީ ދެ ބައިވެ އުފެދުނު ދަ ޑިމޮކްރެެޓްސް އިން ހަރުގެއަކަށް ހަދައި ހުޅުވައިގެން އުޅުނު ތަނުގަ އެވެ.