ސީރިއާގައި ވެއްޓިފައިވާ އިމާރާތެއްގެ ގާތަކުގެ ދަށުން އުފަންވި މި ތުއްތު ކުއްޖާ ބަލަން ހަވާލުވީ މި ބޮޑު ބިންހެލުމުގައި އެ އާއިލާއިން ހަމައެކަނި ސަލާމަތްވި ބޮޑުދައިތަ އާއި ބޮޑުބެ ކަމަށް މީޑިއާ ރިޕޯޓްތައް ބުނެފިއެވެ. އެތައް ހާސް ބަޔަކު ވަނީ މި ތުއްތު ކުއްޖާ އެޑަޕްޓް ކުރަން ހުށަހަޅާފައި ކަމަށާއި ސަލާމަތް ކުރިއިރުވެސް އެ ކުއްޖާ އޮތީ އަމްބްލިކަލް ކޯޑުން މަންމަ އާއި ގުޅިފައި ކަމަށް ބީބީސީ އިން ރިޕޯޓް ކުރެއެވެ. މި ކުއްޖާ ހޮސްޕިޓަލުން ދޫކޮށްލީ ސަލާމަތްވި ހަމައެކަނި އާއިލާގެ މެންބަރު ބޮޑުދައިތަ އާއި ދެމީހުންގެ ޑީއެންއޭ ޓެސްޓް ދިމާވުމުންނެވެ. “ އޭނާ އަކީ މިހާރު އަހަރެންގެ ދަރިއެއް. އަހަރެން އޭނާ އާއި އަހަރެންގެ ދަރިން ތަފާތެއް ނުކުރާނަން” ބޮޑުދައިތަގެ ފިރިމީހާ ބުންޏެވެ. މިކުއްޖާ އަށް ކިޔާފައިވަނީ ވިހެއުމަށްފަހު މަރުވި އޭނާގެ މަންމަގެ ނަން އަފުރާއެވެ. ރިޕޯޓްތައް ބުނާ ގޮތުން މި ކުއްޖާ ސަލާމަތް ކުރީ ވިހޭތާ 10 ގަޑިއިރު ފަހުންނެވެ. ހޮސްޕިޓަލަށް ގެންދިޔައިރު މުޅި ގައިގެ އެކި ތަންތަނުން ވަނީ ކަނޑައިގެންވެސްފައެވެ.
Hiraas is your news website. We provide you with the latest breaking news from Maldives and around the world.
© Hiraas News