އުތުރު އިންޑިޔާގެ އުއްތަރު ޕްރަދޭޝް ސްޓޭޓުގެ ޖާންސީ ސިޓީގައި ހުންނަ ހޮސްޕިޓަލެއްގެ ނިއޯނޭޓަލް އިންޓެންސިވް ކެއަރ ޔުނިޓުގައި ހުކުރު ދުވަހުގެ ރޭ ހިނގި އަލިފާނުގެ ހާދިސާއެއްގައި 10 ތުއްތުކުދިން މަރުވެެ، 16 ކުދިން ޒަޚަމްވެއްޖެއެވެ.
މި ހާދިސާ ހިނގިއިރު ވޯޑުގައި ތިބި 55 ކުދިންގެ ތެރެއިން 45 ކުދިން ސަލާމަތްކުރެވުނު ކަމަށް ލޯކަލް އޮފިޝަލް ބިމަލް ކުމާރު ދުބޭ ވިދާޅުވިއެވެ. އަދި މި ކުދިންނަށް މިހާރު ވެސް ބޭސްފަރުވާ ދެމުންދާ ކަމަށް އޭނާ ވިދާޅުވިއެވެ.
އަލިފާން ރޯވި ސަބަބު އަދި ސާފުވެފައި ނުވާ ކަމަށް އޮފިޝަލުން ބުނެއެވެ. ހޮނިހިރު ދުވަހު ހޮސްޕިޓަލަށް ޒިޔާރަތްކުރެއްވި އުއްތަރު ޕްރަދޭޝްގެ ޑެޕިއުޓީ ޗީފް މިނިސްޓަރ ބްރަޖޭޝް ޕަތާކް ވަނީ މި ހާދިސާގެ ތަޙްޤީޤެއް ކުރިއަށް ގެންދާނެ ކަމަށާއި، ޒިންމާދާރުވާންޖެހޭ ފަރާތްތަކާ މެދު ފިޔަވަޅު އަޅާނެ ކަމަށް އަޅާނެ ކަމަށް ވިދާޅުވެފައެވެ. އަދި މި ހާދިސާގައި ގެއްލުން ލިބުނު އާއިލާތަކަށް ސަރުކާރުން އެހީތެރިކަން ފޯރުކޮށްދޭނެ ކަމަށް ވެސް އޭނާ ވިދާޅުވިއެވެ.
ފަޔަރ ފައިޓަރުން އައިއިރު ވޯޑު ތެރެއަށް އަލިފާންގަނޑު ވަނީ ފެތުރިފައެވެނުރަސްކަލުން ސަލާމަތްކުރުމަށް ޓަކައި ކުޑަދޮރުތައް ތަޅާލަން ޖެހުނެވެ. ލޮލުން ދުށް މީހުން ބުނާ ގޮތުގައި އަލިފާން ރޯވިތާ 30 މިނެޓު ފަހުން ރެސްކިއު އޮޕަރޭޝަން ފެށުމުން ސަލާމަތްކުރުމުގެ މަސައްކަތަށް ލަސްވެފައިވެއެވެ.
މި ހާދިސާއާ ގުޅިގެން ހޮސްޕިޓަލުގެ ސަލާމަތީ ފިޔަވަޅުތަކާ މެދު ސުވާލު އުފެދިފައިވެއެވެ. އިންޓެންސިވް ކެއަރ ޔުނިޓުގައި ފަޔަރ އެލާމް ހަރުކޮށްފައި ހުރި ނަމަވެސް، އަލިފާން ރޯވިއިރު އެލާމް އިއްވިފައި ނުވާ ކަމަށް ބެލެނިވެރިންނާއި ހެކިން ބުނެއެވެ. ހޮސްޕިޓަލުގެ މުވައްޒަފުން ޙަރަކާތްތެރިވީ ދުން އަރާ އަލިފާން ފެނުމުންނެވެ.
“ސަލާމަތީ އެލާމް މަސައްކަތްކޮށްފައި ނަމަ، އަހަރެމެންނަށް އަވަހަށް ޙަރަކާތްތެރިވެ އިތުރު ފުރާނަތަކެއް ސަލާމަތްކުރެވުނީސް،” މި ހާދިސާގައި ދަރިފުޅު ގެއްލުނު ބެލެނިވެރިއެއް ކަމަށްވާ ނަރޭޝް ކުމާރު ބުންޏެވެ.
އިންޑިޔާގައި މިފަދަ އަލިފާނުގެ ހާދިސާތައް އާންމުކޮށް ހިނގައެވެ. މީގެ މައިގަނޑު ސަބަބުތަކުގެ ތެރޭގައި އިމާރާތްކުރުމުގެ ޤާނޫނުތަކާއި ސަލާމަތީ މިންގަނޑުތަކަށް ޢަމަލު ނުކުރުމާއި، ރަނގަޅަށް މަރާމާތު ނުކުރުމާއި، އަލިފާން ނިއްވުމުގެ އާލާތްތައް އެކަށީގެންވާ ގޮތުގައި ނުބެހެއްޓުން ހިމެނެއެވެ.
މި ހާދިސާގައި ދަރިފުޅު ސަލާމަތްވެ، މިހާރު އެހެން ވޯޑެއްގައި ފަރުވާ ދެމުންދާ އަޚްތަރު ޙުސައިން ބުނި ގޮތުގައި ހޮސްޕިޓަލުގައި ރަނގަޅު ސަލާމަތީ ފިޔަވަޅުތަކެއް އެޅިފައި ހުރި ނަމަ، މި ހިތާމަވެރި ހާދިސާ ހުއްޓުވިދާނެއެވެ.
މިއީ އިންޑިޔާގައި ފަހަކަށް އައިސް ހިނގި މިފަދަ ފުރަތަމަ ހާދިސާއެއް ނޫނެވެ. މިދިޔަ މެއި މަހު ނިއު ދިއްލީގެ ކުޑަކުދިންގެ ހޮސްޕިޓަލެއްގައި ހިނގި އަލިފާނުގެ ހާދިސާއެއްގައި 6 ތުއްތުކުދިން މަރުވެފައި ވެއެވެ. އަދި މީގެ 3 އަހަރު ކުރިން މަހާރާޝްޓްރާ ސްޓޭޓުގެ ހޮސްޕިޓަލެއްގައި ހިނގި އަލިފާނުގެ ހާދިސާއެއްގައި 10 ތުއްތުކުދިން މަރުވިއެވެ.
މި ހާދިސާއާ ގުޅިގެން އިންޑިޔާގެ ހޮސްޕިޓަލުތަކުގެ ސަލާމަތީ ފިޔަވަޅުތައް ހަރުދަނާކުރުމަށް ގޮވާލުންތައް އިތުރުވެފައިވެއެވެ. އަދި މިފަދަ ހާދިސާތައް ތަކުރާރުވިޔަ ނުދިނުމަށް ޓަކައި ސަރުކާރުން އަވަސް ފިޔަވަޅުތަކެއް އަޅަންޖެހޭ ކަމަށް ގިނަ ފަރާތްތަކުން ބުނަމުންދެއެވެ.