ސަޢޫދީ ޢަރަބިއްޔާގެ ވިޔަފާރީގެ ވަޒީރު ޑރު ޑރ. މާޖިދު އަލް-ޤަސަބީ ޤައުމީ، ދީނީ އަދި މަޒުހަބީ ނިޝާންތަކާއި ލޯގޯތައް ވިޔަފާރީގެ ބޭނުމަށް ބޭނުންކުރުން މަނާކުރައްވައިފިއެވެ. މި ނިންމެވުމުގެ މަޤްޞަދަކީ މި ނިޝާންތަކުގެ ޤަދަރު ހިފެހެއްޓުމާއި ނަހަމަ ގޮތުގައި ބޭނުންކުރުން ހުއްޓުވުމެވެ.
މި އައު ޤަވާޢިދުގެ ދަށުން، އުފެއްދުންތަކުގައާއި އިޝްތިހާރުތަކުގައި އަދި އެހެނިހެން ވިޔަފާރީގެ ޙަރަކާތްތަކުގައި ޤައުމީ، ދީނީ އަދި މަޒުހަބީ ނިޝާންތައް ބޭނުންކުރުން ވަނީ މަނާކުރެވިފައެވެ.
މި ޤަވާޢިދާ ޚިލާފުވާ ފަރާތްތަކަށް ސަޢޫދީ ޢަރަބިއްޔާގެ މުނިސިޕަލް އަދަބުދިނުމުގެ ޤާނޫނުތަކުގެ ދަށުން އަދަބު ދިނުމަށް ވަނީ ނިންމާފައެވެ. އަދި މި ނިންމުން ރަސްމީ ގެޒެޓުގައި ޝާއިޢުކުރާތާ 90 ދުވަހުގެ ތެރޭގައި ޢަމަލުކުރަން ފެށޭނެއެވެ. މި މުއްދަތު ދެވިފައިވަނީ ވިޔަފާރިތަކަށް މި އައު އުސޫލުތަކަށް ހޭނުމަށް ފުރުޞަތު ދިނުމަށެވެ.
ވިޔަފާރީގެ ވުޒާރާއިން ފާހަގަކުރެއްވި ގޮތުގައި މި މަނާކުރުމަކީ މިހާރުވެސް ޢަމަލުކުރަމުންދާ ޤަވާޢިދުތަކާ ގުޅިފައިވާ ކަމެކެވެ. މީގެ ކުރިންވެސް ސަޢޫދީ ޢަރަބިއްޔާގެ ޤައުމީ ދިދަ – އިސްލާމްދީނުގެ ޝަހާދަތާއި ދެ ކަނޑި އަދި ކަދުރު ރުކެއް ހިމެނޭ ދިދަ – ވިޔަފާރީގެ ބޭނުމަށް ބޭނުންކުރުން ވަނީ މަނާކޮށްފައެވެ.
މީގެ އިތުރުން، ސަޢޫދީ ވެރިންގެ ފޮޓޯތަކާއި ނަންތައް ޗާޕުކުރެވިފައިވާ ތަކެތީގައާއި، އުފެއްދުންތަކުގައި، ޚާއްޞަ ހަދިޔާތަކުގައި އަދި ޕްރޮމޯޝަނަލް ތަކެތީގައި ބޭނުންކުރުންވެސް ވަނީ މަނާކުރެވިފައެވެ.
ވިޔަފާރީގެ ވުޒާރާއިން ވިދާޅުވި ގޮތުގައި މި ނިންމުމަކީ މި ނިޝާންތަކުގެ ޘަޤާފީ އަދި ދީނީ މުހިންމުކަން ދެމެހެއްޓުމާއެކު، އޭގެ ނަހަމަ ބޭނުން ހިފުމުން ރައްކާތެރިކުރުމަށް އެޅޭ މުހިންމު ފިޔަވަޅެކެވެ.