މައްކާގައި ހުންނަ ހިރާ ހޮހޮޅައަށް ފަސޭހައިން ވާސިލުވުމަށްޓަކައި ކޭބަލް ކާރު ނިޒާމެއް ޤާއިމްކުރުމަށް ސަޢޫދީ ޢަރަބިއްޔާއިން ނިންމައިފިއެވެ. މި މަޝްރޫޢު ފެށުމަށް ހަމަޖެހިފައިވަނީ 2025 ވަނަ އަހަރުއެވެ.
މައްކާގެ ޖަބަލުއްނޫރުގައި ހުންނަ ހިރާ ހޮހޮޅައަކީ މައްސްޖިދުލް ޙަރާމުން 4 ކިލޯމީޓަރު ދުރުގައި، 634 މީޓަރުގެ އުސްމިނެއްގައި ހުންނަ ތަނެކެވެ. މި މަޝްރޫޢުގެ މަޤްޞަދަކީ ޙައްޖު އަދި ޢުމްރާ ޒިޔާރަތްތެރިންނަށް ފަސޭހަކަމާއެކު މި ތާރީޚީ އަދި ދީނީ ގޮތުން މުހިންމު ތަނަށް ޒިޔާރަތްކުރެވޭނެ މަގު ތަނަވަސްކޮށްދިނުމެވެ.
މި ކޭބަލް ކާރު މަޝްރޫޢަކީ ފާއިތުވި އަހަރު ސަޢޫދީ ޢަރަބިއްޔާގައި ފެށި “ހިރާ ޘަޤާފީ ސަރަޙައްދު” ގެ ބައެކެވެ. މި ސަރަޙައްދަކީ 67،000 އަކަ މީޓަރުގެ ބޮޑު ސަރަޙައްދެކެވެ.
ހިރާ ހޮހޮޅައަކީ ނަބިއްޔާ މުޙައްމަދު ޞައްލަﷲ ޢަލައިހި ވަސައްލަމައަށް ފުރަތަމަ ވަޙީ ބާވައިލެއްވުނު ތަން ކަމުގައިވުމުން، މި ތަނަކީ އިސްލާމީ ތާރީޚުގައި ވަރަށް މުހިންމު މަޤާމެއް ލިބިގެންވާ ތަނެކެވެ. މިހާތަނަށް މި ތަނަށް ދަތުރުކުރުމަކީ ފަރުބަދައިގެ އުސްމިނާއި އުނދަގޫ މަގުގެ ސަބަބުން ދަތިކަމަކަށް ވެފައިވީ ނަމަވެސް، މިއަހަރު ތާރު އަޅައިގެން މަގެއް ހަދައި ނިމިފައިވެއެވެ.
ކޭބަލް ކާރު ނިޒާމުގައި ފަރުބަދައިގެ އެކި ހިސާބުތަކުގައި ސްޓޭޝަންތައް ހުންނާނެއެވެ. އަދި ހުރިހާ އުމުރުފުރައެއްގެ އަދި ޤާބިލިއްޔަތުތަކެއްގެ މީހުންނަށް ފަސޭހައިން ބޭނުންކުރެވޭ ގޮތަށް ފަރުމާކުރެވޭނެއެވެ. މީގެ އިތުރުން ތިމާވެށްޓަށް ކުރާ އަސަރު ކުޑަކުރުމަށް ދެމެހެއްޓެނިވި ޑިޒައިން އުސޫލުތަކެއް ބޭނުންކުރެވޭނެއެވެ.