އުތުރު ކޮރެއާގެ އިރުމަތީ އައްސޭރިފަށުން ކަނޑުގެ ސަރަހައްދަށް ގިނަ އަދަދެއްގެ ބެލިސްޓިކް މިސައިލްތަކެއް ފޮނުވާލާފައިވާ ކަމަށް ދެކުނު ކޮރެއާ އާއި ޖަޕާނުން ބުނެފިއެވެ. މިއަދު ހިނގި މި ހާދިސާއަކީ މިއަހަރުގެ ތެރޭގައި އުތުރު ކޮރެއާއިން ބެލިސްޓިކް މިސައިލް ފޮނުވާލި ހަތްވަނަ ފަހަރެވެ. އަދި މިއީ މި އެޕްރީލް މަހުގެ ތެރޭގައި މިފަދަ ހަމަލާއެއް ދިން ހަތަރުވަނަ ފަހަރެވެ.
ދެކުނު ކޮރެއާގެ އަސްކަރިއްޔާއިން ނެރުނު ބަޔާނެއްގައި ބުނެފައިވަނީ، މިސައިލްތައް ފޮނުވާލާފައިވަނީ މިއަދު ހެނދުނު 6:10 އެހާއިރު އުތުރު ކޮރެއާގެ އިރުމަތީ އައްސޭރިފަށުގައި އޮންނަ ސިންޕޯ ސިޓީ ކައިރިން ކަމަށެވެ. މި ހާދިސާއާ ގުޅިގެން ދެކުނު ކޮރެއާގެ ސަވައިލަންސް ވަރުގަދަކޮށް، އެމެރިކާ އާއި ޖަޕާނާއެކު ގާތުން މައުލޫމާތު ބަދަލުކުރަމުންދާ ކަމަށްވެސް އެ ގައުމުން ބުނެފައިވެއެވެ.
ޖަޕާނު ސަރުކާރުން ބުނެފައިވަނީ މި ބެލިސްޓިކް މިސައިލްތައް ވެއްޓިފައިވަނީ ކޮރެއާ ޕެނިންސިއުލާގެ އިރުމަތީ އައްސޭރިފަށުގެ ކަނޑުގެ ސަރަހައްދަށް ކަމަށް ބެލެވޭ ކަމަށެވެ. ނަމަވެސް ޖަޕާނުގެ އިގްތިސާދީ ހާއްސަ ސަރަހައްދަށް މިސައިލެއް ވަދެފައިވާކަން ކަށަވަރުވެފައި ނުވާ ކަމަށް އެ ގައުމުން ބުނެއެވެ. މިކަމާ ގުޅިގެން ދެކުނު ކޮރެއާގެ ރިޔާސީ އޮފީހުން ވަނީ ކުއްލި ސަލާމަތީ ބައްދަލުވުމެއް ބާއްވާފައެވެ.
އުތުރު ކޮރެއާގެ މިސައިލް ޕްރޮގްރާމާ ދެކޮޅަށް އދ. ގެ ސަލާމަތީ މަޖިލީހުން ކަނޑައަޅާފައިވާ ގަރާރުތަކާ މިފަދަ ޓެސްޓްތައް ހިލާފުވެއެވެ. ނަމަވެސް ބައިނަލްއަގުވާމީ ގޮތުން އެކަހެރިވެފައިވާ އުތުރު ކޮރެއާއިން އދ. ގެ މި މަނާކުރުންތައް ގަބޫލެއް ނުކުރެއެވެ. އެ ގައުމުން ބުނަމުންދަނީ މިއީ އަމިއްލަ ދިފާއުގައި އެ ގައުމަށް ލިބިގެންވާ ސިޔާދަތީ ހައްގެއް ކަމަށެވެ.
މި މިސައިލްތައް ފޮނުވާލާފައި މިވަނީ ޗައިނާގެ ރައީސް ޝީ ޖިންޕިންގް އާއި އެމެރިކާގެ ރައީސް ޑޮނަލްޑް ޓްރަމްޕް މެއި މަހުގެ މެދުތެރޭގައި ބޭއްވުމަށް ހަމަޖެހިފައިވާ ސަމިޓަށް ތައްޔާރުވަމުންދާ ދަނޑިވަޅެއްގައެވެ. މި ސަމިޓުގައި އުތުރު ކޮރެއާގެ މައްސަލައާ މެދު ދެ ބޭފުޅުން މަޝްވަރާ ކުރައްވާނެ ކަމަށް ބެލެވެއެވެ.
އިންޓަނޭޝަނަލް އެޓޮމިކް އެނާޖީ އެޖެންސީ ގެ ވެރިޔާ ރަފައެލް ގްރޮސީ ވިދާޅުވި ގޮތުގައި، އުތުރު ކޮރެއާއިން ނިއުކްލިއާ ހަތިޔާރު އުފެއްދުމުގެ ގާބިލުކަން ވަނީ ވަރަށް ބޮޑަށް އިތުރުކޮށްފައެވެ. އަދި އުތުރު ކޮރެއާގެ ލީޑަރު ކިމް ޖޮންގް އުން ދާދި ފަހުން ވިދާޅުވެފައިވަނީ އެ ގައުމަކީ ނިއުކްލިއާ ބާރެއްގެ ގޮތުގައި އޮތް އޮތުމަކީ ބަދަލު ނުކުރެވޭނެ ކަމެއް ކަމަށާއި، ގައުމީ ސަލާމަތަށްޓަކައި ނިއުކްލިއާ ގާބިލުކަން އިތުރުކުރުމަކީ ކޮންމެހެން ބޭނުންތެރި ކަމެއް ކަމަށެވެ.