އިނގިރޭސިވިލާތުގައި ބުޅަލެއް މެރި މީހަކު 10 މަހަށް ޖަލަށްލުމަށް ހުކުމް ކޮށްފި އެވެ.
25 އަހަރުގެ އެންޑްރޫ ކޮއިލް ނަމަކަށް ކިޔާ މި މީހާ ޖަލަށް ލާފައިވަނީ ފެބްރުއަރީ 5 ވަނަ ދުވަހު އޭނާ އޮޅުކޮށްގެން ގެންގުޅުނު ބުޅަލަށް ނުހައްގުން އިހާނެތިކޮށް ހިތައި އަނިޔާކޮށް މަރާލުމާއި ގުޅިގެންނެވެ.
ކޮއިލް ބުޅާ މެރި ވާހަކަ ބުނެފައިވަނީ އޭނާގެ އާއިލާ މީހަކަަށް ކުރި ވީޑިއޯ ކޯލެއްގެ ތެރެއިންނެވެ. އަދި މި އާއިލާ މީހާ ވަނީ މިކަން ވަގުތުން ފުލުހުންނަށް އަންގާފަ އެވެ. މަރާލި ބުޅާ ފުލުހުން ހޯދާފައި ވަނީ ކޮއިލް ދިރިއުޅޭ ގޭގެ ބޭރުގައި ހުރި ޑަސްބިން ތެރެއިންނެވެ.
ބުޅާ މެރުމުން ދިހަ މަހުގެ ޖަލު ހުކުމެއްގެ އިތުރުން ފަނޑިޔާރު ވަނީ އޭނާއަށް މީގެ ފަހުން އޮޅުކޮއްގެން އެއްވެސް ބާވަތެއްގެ ޖަނަވާރެއް ގެންގުޅުން މަނާކޮށް ހުކުމް އިއްވާފަ އެވެ.