ޕީޕަލްސް ނެޝަނަލް ކޮންގްރެސްގެ ޓިކެޓްގައި ރިޔާސީ އިންތިހާބުގައި ވާދަކުރައްވާނެ ކެންޑިޑޭޓަކު ކަނޑައަޅާނީ މިއަދު ހަވީރު 4 ޖަހާއިރު އޮންނަ މަޝްވަރާ މަޖިލީހުގައި ކަމަށް އެޕާޓީން ބުނެފިއެވެ.
ޕީއެންސީން ނެރުނު ބަޔާނެއްގައި ބުނީ ސެޕްޓެމްބަރު 9 ވާ ހޮނިހިރު ދުވަހު ބޭއްވުމަށް ހަމަޖެހިފައިވާ ރިޔާސީ އިންތިހާބުގައި އެ ޕާޓީގެ ޓިކެޓްގައި ވާދަކުރުމަށް އެދޭ ފަރާތްތަކުން މިއަދު މެންދުރުފަހު 2 ގެ ކުރިން ޕާޓީގެ ރައީސްއަށް އެޑްރެސްކޮށް ޝައުގުވެރިކަން ފާޅުކުރާކަން ބަޔާންކުރާ ލިޔުމެއް ޕާޓީއަށް ފޮނުވުމަށް އެދޭ ކަމަށެވެ.
ރިޔާސީ އިންތިހާބުގައި ވާދަކުރަން އެ ޕާޓީން ނިންމީ ޕީއެންސީގެ މަޝްވަރާ މަޖިލީހުގެ އަގުލަބިއްޔަތުން މިއަދު އެގޮތަށް ނިންމުމުންނެވެ.
