އިންތިހާބަށް 10 ދުވަހަށް ވުމުން ރައްޔިތުންނަށް ދަޅަދައްކަން ވިއަސް މި ސަރުކާރުން ފަށާފައިހުރިނަމަ ހުރި ހުރިހާ މަޝްރޫއެއް ކުރިއަށް ގެންގޮސް ނިންމާލަދޭނެ ކަމުގެ ޔަގީންކަން ޑރ މުހައްމަދު މުއިއްޒު ދެއްވައިފިއެވެ.
ތުލުސްދޫ ދާއިރާގެ ރައްޔިތުންނާއި އެކު މިރޭ ބޭއްވި ޖަލްސާގައި ވާހަކަފުޅު ދައްކަވަމުން ޑރ މުއިއްޒު ވިދާޅުވީ އޭނާގެ ވެރިކަމެއްގައި ރަށްތަކުގައި ހިންގާ ކޮންމެ މަޝްރޫއެއް ގެންދާނީ ރައްޔިތުން ބޭނުންވާ ގޮތަށް ބަދަލުކޮށްގެން ކަމަށެވެ.
އަދި ތުލުސްދޫ ދާއިރާގެ ރަށްތަކަށް ދިމާވެފައިވާ އެންމެ ބޮޑު މައްސަލައަކީ މަގު ހެދުން ކަމަށާއި އެންމެ ބޮޑަށް ހަލާކުވެފައި ހަދަންޖެހިފައި ހުރި މަގުތައް ބަލާ ތަރުތީބުން އެކަން ކުރަމުންދާނެ ކަމަށްވެސް ޑރ މުއިއްޒު ވިދާޅުވިއެވެ.
“ ތުލުސްދޫ، ހުރާ، ދިއްފުށި އަދި ހިންމަފުށީގައިވެސް ސްކޫލަށް މަލްޓިޕާރޕަސް ހޯލު އިތުރުކޮށް ލައިބްރަރީ ބޭނުންވާ ސްކޫލްތަކަށް ލައިބްރަރީ އާއި ކޮމްޕިއުޓަރު ލެބް ބޭނުންވާ ސްކޫލްތަކަށް އެކަންވެސް ކޮށްދޭނަން” ޑރ މުއިއްޒު ވިދާޅުވިއެވެ.
