މިއަހަރުގެ ފުރަތަމަ ކުއާޓަރުގައި ފުލުހުންގެ މުސާރަ ބޮޑުކުރާ ގޮތަށް ހަމަޖެހިފައިވާ ކަމަށް ފިނޭންސް މިނިސްޓަރު ޑރ. މުހައްމަދު ޝަފީގު ވިދާޅުވެއްޖެއެވެ.
ބައެއް މީޑިއާތަކަށް މައުލޫމާތުދެއްވަމުން ފިނޭންސް މިނިސްޓަރ ވިދާޅުވީ މުސާރަތައް ބޮޑުކުރުމުގައި މިހާރު ކުރެވެމުންދާ މަސައްކަތަކީ އެކަމަށް ބޭނުންވާ ސްޓްރަކްޗަރ އެކުލަވާލުމުގެ މަސައްކަތްކަމަށެވެ. އަދި ވަރަށް އަވަހަށް ސްޓްރަކްޗަރ އެކުލަވާލާނެ ކަމަށާއި އެއާއެކު މުސާރައަށް އަންނަ ބަދަލު އެނގިގެންދާނެކަމަށް މިނިސްޓަރ ވިދާޅުވިއެވެ.
” މީގެ އެންމެ މުހިންމު އެއް ބޭނުމަކީ ޕޭ ހާމަނައިޒްކުރުން. އެއް މުއައްސަސާއާއި އަނެއް މުއައްސަސާގެ މުސާރައިގެ ފަރަގު ކުޑަކުރުން. އަދި މުސާރައިގެ ފަރަގު ކުޑަކޮށް ކޮންމެ އިދާރާއަކަށްވެސް ރަނގަޅު މުވައްޒަފުން ހޯދައި ރަނގަޅު މުވައްޒަފުން ހިފެހެއްޓުން”. މިނިސްޓަރ ވިދާޅުވިއެވެ.
ފިނޭންސް މިނިސްޓަރ މިފަދައިން ވިދާޅުވެފައިވާއިރު ޗީފް ސްޕްރިންޓެންޑެންޓް އޮފް ޕޮލިސް އަހްމަދު ޝިފާން ކުރެއްވި ޓުވީޓެއްގައި ވިދާޅުވީ މި އަހަރުގެ މާރިޗް މަހުގެ އެއް ވަނަ ދުވަހުން ފެށިގެން ފުލުހުންގެ މުސާރަ ބޮޑު ކުރެވޭނެކަން މާލީ ވުޒާރާއިން އެ ދެ އިދާރާއަށް އަންގާފައިވާ ކަމަށެވެ.
ސިފައިންނާއި ފުލުހުންގެ މުސާރަ ބޮޑުކުރުމަކީ ރިޔާސީ އިންތިހާބުގެ ތެރޭގައި ރައީސުލްޖުމުހޫރިއްޔާ ޑރ މުހައްމަދު މުއިއްޒު ވެވަޑައިގެންނެވި ވައުދެކެވެ.