ހިލޭއެހީގެ ގޮތުގައި 130 މިލިއަން އެމެރިކާ ޑޮލަރުގެ އެހީ ޗައިނާއިން ރާއްޖެއަށް ދޭން ނިންމާފައިވާ ކަމަށް ރައީސުލްޖުމުހޫރިއްޔާ ޑރ މުހައްމަދު މުއިއްޒު ވިދާޅުވެއްޖެއެވެ.
ރައީސް މިކަން އިއުލާނު ކުރެއްވީ ޗައިނާއަށް ކުރެއްވި ފުރަމާނަ ދަތުރުފުޅަށްފަހު ވެލާނާ އެއަރޕޯޓުގައި ނޫސްވެރިންނަށް މައުލޫމާތުދެއްވަމުންނެވެ.
ރައީސުލްޖުމްހޫރިއްޔާ ވިދާޅުވީ މި ހިލޭ އެހީގެ އެންމެ ބޮޑުބައެއް ޚަރަދުކުރަން ހަމަޖެހިފައިވަނީ މާލޭގެ މަގުތައް ހެދުމުގެ މަސައްކަތަށް ކަމުގައެވެ. މީގެ އިތުރުން މި ދަތުރުފުޅުގައި ދެޤައުމުގެ ދެމެދު އެއްބަސްވުންތައް ޤާއިމުކުރެވުނު ކަންކަމުގެ ތަފްޞީލުތައް ދެއްވަމުން، ރަސްމާލޭގައި 30،000 ސޯޝަލް ހައުސިންގ ޔުނިޓް ޤާއިމުކުރުމުގެ އެއްބަސްވުމާއި، ވެލާނާ އިންޓަރނޭޝަނަލް އެއަރޕޯޓް ތަރައްޤީކުރުމަށް ސަރުކާރުން ދާދިފަހުން އިޢުލާންކުރި ޕްލޭނާ އެއްގޮތަށް ތަރައްޤީކުރުމުގެ އެއްބަސްވުމާއި، ހުޅުމާލޭގެ ދެވަނަ ފިޔަވަހީގައި ކޮމަރޝަލް ޑިސްޓްރިކްޓްގައި 7 ކޮމަރޝަލް ބިލްޑިންގ ހިމެނޭ ކޮމަރޝަލް ސްޕައިން ސަރަހައްދު ތަރައްޤީކުރުމަށް ޗައިނާގެ ކުންފުންޏަކާއެކު ވީ އެއްބަސްވުން ރައީސުލްޖުމްހޫރިއްޔާ ފާހަގަކުރެއްވިއެވެ. މި ނޫންވެސް މި ދަތުރުފުޅުގައި ވެވުނު މުހިންމު އެއްބަސްވުންތަކުގެ ތަފްސީލުތައް ރައީސުލްޖުމްހޫރިއްޔާ ދެއްވިއެވެ.
މީގެ އިތުރުން ޗައިނާއަށް ދައްކަންޖެހޭ އެކިއެކި ލޯނުތައް ދެއްކުމުގައި މިހާރު އޮތް ތާވަލަށް ލުއިތަކެއް ހޯދައިދިނުމަށް ދެޤައުމުގެ އެންމެ މަތީ ފަންތީގައި މަޝްވަރާކުރެވި އެކަމަށް ލުއި ގޮތްތަކެއް ހަމަޖެހިގެންދާނެކަމުގައި ރައީސުލްޖުމްހޫރިއްޔާ ވިދާޅުވިއެވެ.
ރައީސުލްޖުމްހޫރިއްޔާގެ ދެކަނބަލުން މިމަހުގެ 7 އިން 13އަށް ޗައިނާއަށް ކުރެއްވި ފުރަމާނަ ދަތުރުފުޅުގައި އެދެކަނބަލުންގެ އަރިހުގައި ސަރުކާރުގެ މަތީފަންތީގެ ވަފުދެއް ބައިވެރިވެވަޑައިގެންނެވިއެވެ.