ފަހުވަގުތަށް މަޑުނުކޮށް ވީހާވެސް އަވަހަށް ވޯޓުލުމުގެ ހައްޤު އަދާކުރެއްވުމަށް ރައީސުލްޖުމުހޫރިއްޔާ ޑރ މުހައްމަދު މުއިއްޒު އިލްތިމާސްކުރައްވައިފިއެވެ.
ރައީސް މިގޮތަށް އިލްތިމާސްކުރެއްވީ މިހާރު ކުރިއަށްދާ ބައި-އިލެކްޝަންގައި ވޯޓު ލެއްވުމަށްފަހުއެވެ.
އެމަނިކުފާނު ވޯޓުލެއްވީ ސޯޝަލް ސެންޓަރުގައި ބަހައްޓާފައިވާ މާފަންނު ދެކުނު ދާއިރާގެ ވޯޓުފޮއްޓަށެވެ. އެމަނިކުފާނު ވޯޓުލައްވަން ވަޑައިގެންނެވީ ޗައިނާ ދަތުރުފުޅު ނިންމަވާ ރާއްޖެ ވަޑައިގެންނެވުމަށްފަހުއެވެ.
ވޯޓުލެއްވުމަށްފަހު ރައީސް ވިދާޅުވީ ހުރިހާ ބޭފުޅުންވެސްލިބިފައިވާ ވޯޓު ދިނުމުގެ ހައްގު އަދާކުރެއްވުމަށެވެ. އީސީގެ ތަފާސް ހިސާބުތައް ދައްކާގޮތުން މެންދުރުފަހު ތިނެއް ޖެހުމާއި ހަމައަށް ވޯޓުލާފައިވަނީ 21 އިންސައްތަ މީހުންނެވެ. ނަމަވެސް އިންތިހާބުގައި ވޯޓުދިނުމުގެ ހައްގު 56 ހާސް މީހުންނަށް ލިބިގެންވެއެވެ.