މިއަހަރު ބާއްވާ 20 ވަނަ ރައްޔިތުންގެ މަޖިލީހުގެ އިންތިހާބުގައި އަދާލަތު ޕާޓީން ވާދަކުރާނީ އެންމެ ހަތަރު ދާއިރާއަށް ކަމަށް ނިންމައި އެ ޕާޓީގެ ޓިކެޓަށް އެދި ހުށަހެޅުމުގެ ފުރުސަތު މިއަދު ހުޅުވައިލައިފިއެވެ.
އަދާލަތު ޕާޓީން ވަނީ 19 ވަނަ މަޖިލިހުގެ އިންތިހާބުގައި 9 ދާއިރާއަކަށް ވާދަކޮށްފައެވެ. ނަމަވެސް 19 ވަނަ މަޖިލީހުގެ އެއްވެސް ގޮނޑިއަކަށް އަދާލަތު ޕާޓީގެ މެންބަރަކު އިންތިހާބެއްނުވިއެވެ.
މި ތަޖުރިބާއަށް ބަލައި އަދާލަތުން މިފަހަރުގެ މަޖިލިސް އިންތިހާބުގައި ވާދަކުރުމަށް ނިންމާފައިވަނީ ވައިކަރަދޫ ދާއިރާއާއި މަކުނުދޫ ދާއިރާއާއި އިނގުރައިދޫ ދާއިރާ އަދި ފެލިދޫ ދާއިރާ އަށެވެ.
އެޕާޓީން ކުރި އިއުލާނެއްގައި ބުނީ މި ދާއިރާތަކަށް ކުރިމަތިލުމުގެ ސުންގަޑިއަކީ މި މަހުގެ 23 ވާ އަންގާރަ ދުވަހުގެ 16:00 ކަމަށެވެ.
ރައްޔިތުންގެ މަޖިލީހުގެ އިންތިހާބު ބޭއްވުމަށް ނިންމާފައިވަނީ މިއަހަރުގެ މާރޗު 17 ވަނަ ދުވަހުއެވެ. މިފަހަރު މަޖިލީހަށް 93 މެންބަރުން އިންތިހާބު ކުރާނެއެވެ.
