އެހެން އަހަރުތަކެކޭވެސް އެއްފަދައިން މިއަހަރުގެވެސް ރަމަޟާންމަހު، ރޯދަ އިނާޔަތުގެ ގޮތުގައި ކޮންމެ މުސްލިމު މުވައްޒަފަކަށް 3000 ރުފިޔާ ދިނުމަށް ޕްރަވަޓައިޒޭޝަން އެންޑް ކޯޕަރޭޝަން ބޯޑުން ކަނޑައަޅައިފި އެވެ.
އެ ބޯޑުން ނެރުނު ބަޔާނުގައި ވަނީ ސަރުކާރާއި ސަރުކާރު ހިއްސާވާ ކުންފުނިތަކުގެ މުސްލިމު މުވައްޒަފުންނަށް ވަޒީފާގެ ގާނޫނަށް ގެނެވުނު އިސްލާހުގެ ދަށުން ރޯދަ އިނާޔަތުގެ ގޮތުގައި 3000 ރުފިޔާ ދިނުމަށް ކަނޑައަޅާފަ އެވެ.
މީގެއިތުރުން ރަމަޟާން މަހާއި ގުޅުވައިގެން މުވައްޒަފުންނަށް އިތުރު ހަދިޔާތައް ދޭނަމަ ކުންފުނީގެ ކޭޝްފްލޯއަށް ނުރަނގަޅު އަސަރު ނުކުރާ ވަރަށް އެކަން ކުރުމަށްވެސް ބޯޑުން ވަނީ ބުނެފައެވެ.
މީގެއިތުރުން ގެނެވުނު ބައެއް ބަދަލުތަކުގެ ތެރޭގައި މުސާރަލިބޭގޮތަށް އެއް ވަޒީއަށްވުރެ ގިނަ ވަޒީފާ އަދާކުރާނަމަ، އަސާސީ ވަޒީފާ އަދާކުރާ ތަނަކުން އެކަނި އިނާޔަތުގެ ފައިސާ ދިނުމަށާއި، ކުރިން ބުނެފައިވާ އަދަދަށްވުރެ އިތުރަށް ނުވަތަ މަދުން ފައިސާ ދެވިފައިވާނަމަ މާރޗްމަހުގެ މުސާރަދޭއިރު އެބައި އެޖަސްޓް ކުރުމަށްވެސް ބޯޑުން ވަނީ އަންގާފަ އެވެ.
އަދި ރަމަޟާން މަސް ފެށޭއިރު އޮފީހަށް ހިދުމަތް ނުލިބޭގޮތަށް “ޕޭ ލީވް އަަދި ނޯޕޭ ލީވް”ގައި ތިބޭ މުވައްޒަފުން އިނާޔަތުގައި ނުހިނުމަށްވެސް އެ ބޯޑުން އިސްލާހު ގެނެސްފައިވެއެވެ.
ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ ރިޔާސީ ވައުދުފުޅާއި އެއްގޮތަށް ވަނީ މިއަހަރުގެ ރަމަޟާން މަހުން ފެށިގެން، ކޮންމެ އަހަރެއްގެވެސް ބަރަކާތްތެރި ރަމަޟާން މަހުގެ ފަހު 10 ދުވަހަކީ ސަރުކާރު ބަންދު ދުވަހެއްގެ ގޮތުގައި ސަރުކާރުން ހަމަޖައްސާފައެވެ.