އިދިކޮޅުގެ އެއްވެސް މީހަކު ފަލީހަތް ނުކުރުމަށް ރައީސް ޑރ މުހައްމަދު މުއިއްޒު ވަރަށް މަސައްކަތް ކުރެއްވި ނަމަވެސް އެ މީހުން ފަތުރާ ދޮގު ވާހަކަތަކާ ގުޅިގެން އެކަން ކުރައްވަންޖެހެނީ ކަމަށް ޕީޕީއެމްގެ ޕީޖީ ލީޑަރު، އަދި އޭދަފުށީ ދާއިރާގެ މެމްބަރު އަހްމަދު ސަލީމް ވިދާޅުވެއްޖެ އެވެ.
ސަލީމް އަކީ މި ހިނގާ 19 ވަނަ މަޖިލީހުގައިވެސް އޭދަފުށީ ދާއިރާގެ މެންބަރެވެ. އަދި ކުރިއަށް އޮތް 20 ވަނަ ރައްޔިތުންގެ މަޖިލީހުގެ އިންތިހާބުގައިވެސް އޭދަފުށީ ދާއިރާގެ ގޮނޑިއަށް ސަލީމް ވާދަކުރައްވައެވެ.
ކެމްޕެއިން ޖަލްސާގައި ވާހަކަފުޅު ދައްކަވަމުން ސަލީމް ވިދާޅުވީ، އިބްރާހިމް މުހައްމަދު ސާލިހުގެ މިދިޔަ ސަރުކާރުން ކަންކަން ކޮށްފައިވަނީ ރާވައިގެން ކަމަށާއި އެފަދައިން ކޮށްފައިވާ ކަންކަމުގެ ތަފްސީލުތައް، ތަފްސީލުކޮށް ހާމަކޮށްދިނުމަށް ސަރުކާރާ ޕީއެންސީން ހަވާލުވުމަށް ފަހު އޭނާ ރައީސް އަރިއަހު އެދިވަޑައިގަތް ކަމަށެވެ.
ނަމަވެސް ރައީސް މުއިއްޒު އެކަމަށް އިންކާރު ކުރެއްވި ކަމަށާއި މަޖިލިސް އިންތިހާބުގެ ކެމްޕެއިންގެ ފޯރި މިހާ ގަދަވަންދެންވެސް އެއްވެސް އިދިކޮޅު މީހަކުވިއަސް ފަޟީހަތް ކުރުމަށް ރައީސް ބޭނުންފުޅުވެވަޑައިނުގެންނެވި ކަމަށެވެ.
ނަމަވެސް ކުރީގެ ސަރުކާރުގެ ވެރިން ހަގީގަތާ ހިލާފު އެތައް ކަމެއް މި ސަރުކާރުގެ ބޮލުގައި އަޅުވަން ފަށާފައިވާކަން ފާހަގަކުރައްވައި، ސަލީމް ވިދާޅުވީ އެކަމުގެ ތެދުދޮގު އަދި ކަން އޮތް ގޮތް ރައީސް ހާމަކުރަންވަން ފެއްޓެވީ އެހާ ހިސާބުން ކަމަށެވެ.
އެއަށް ފަހު ސަލީމް ވަނީ އެކަމަކީ ވެސް މާތްالله ނުރުއްސަވާ ސިފައެއް ކަމަށާއި ރަސޫލު ބޭކަލުންގެ ހަޔާތްޕުޅުން ފެނިވަޑައިގެންފައި ވަނީ އެފަދަ މިސާލުތައް ކަމަށެވެ. ނަމަވެސް ވަކި ހާލަތަކަށް ކަންކަން ދިއުމުން އަނިޔާވެރިންގެ ކަންކަން ބޭޒާރު ކުރައްވާނެކަން الله ވަހީކުރައްވާފައިވާކަން ވެސް އޭނާ ފާހަގަކުރެއްވި އެވެ.
