މިމަހު ބާއްވާ 20 ވަނަ ރައްޔިތުންގެ މަޖިލީހުގެ އިންތިހާބުގައި ސަރުކާރަށް މެޖޯރިޓީ ލިބުން ވަރަށް މުހިންމު ކަމަށާއި އޭޕްރީލް 21 ވަނަ ދުވަހު ރައްޔިތުން އެ ޖަހާ ފާހަގައަކި ތަރައްގީގެ ފާހަގައަކަށް ވާންޖެހޭ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސް ވިދާޅުވީ، އެމަނިކުފާނު ރައްޔިތުންނަށް ވެފައިވާ ވައުދުތައް ފުއްދަވާނެ ކަމަށާއި ގައުމަށް ހަމަޖެހުން ގެނެސްދެއްވައި ތަރައްޤީގެ ކުލަ ޖައްސާނެ ކަމަށެވެ.
ނަމަވެސް ރައްޔިތުންގެ ފަރާތުން އެމަނިކުފާނު އެދެނީ މި ސަރުކާރުގެ ސިޔާސަތުތަކުގައި ކުލަޖެއްސުމަށް މަޖިލީހުގެ ތެރެއިން ސަރުކާރަށް އަންނަ ހުރަސްތައް ނައްތާލަން އެހީތެރިވެ ދެއްވުމަށް ކަމަށް ރައީސް ވިދާޅުވިއެވެ. އެގޮތުން މަޖިލީހުގެ މެޖޯރިޓީ ހޯދުމަކީ ވަރަށް މުހިންމު ކަމެއް ކަމަށް އެމަނިކުފާނު ވިދާޅުވިއެވެ.
ރައީސް ވިދާޅުވީ ސަރުކާރަށް އެއްބާރުލުން ނުދޭ ސަރުކާރުގެ މަސައްކަތްތަކަށް ބުރަކި ޖައްސާ މަޑުޖައްސާ ހުރަސްތައް ކުރިމަތިކުރާ މަޖިލީހެއް ހޮވުމުން ނަތީޖާ ނެރުމުގައި މަޑުޖެހުމެއް އަންނާނެ ކަމަށެވެ.
އަދި މަޖިލީހުގެ މެޖޯރިޓީ ސަރުކާރަށް ބޭނުންވަނީ ނަތީޖާ ނެރުމަށް ބާރު ސްޕީޑުގައި ގެންގޮސް ކަންކަން ނިންމާލާ މި ފަސް އަހަރުން ވައުދުތައް ފުއްދަން ކަމަށް ރައީސް ވިދާޅުވިއެވެ.
“ ކޮންމެ ވައުދެއްގައިވެސް ކޮންމެސް ކަހަލަ ކޮންޑިޝަންތަކެއް ޝަރުތަކެއް އެބަހުރޭ. ފުރިހަމަވާންޖެހޭ ކަންކަންހުރޭ. އެކަމެއް ކުރެވޭނީ މަޝްރޫއެއް ކުރިއަށްދާއިރުވެސް އެ މަޝްރޫއަށް ބޭނުންވާ ކަންކަން ފުރިހަމަވެގެން. އޭގެތެރޭގައި މިއަންނަނީ މަޖިލީހުން ބޭނުންވާ ކަހަލަ ހުއްދަތައްވެސް.” ރައީސް ވިދާޅުވިއެވެ.
އެހެންކަމުން ކުރިއަށް އޮތް އިންތިހާބުގައި މަޖިލީހުގެ މެޖޯރިޓީ ނަގައިދިނުމަށް ރައީސް ތަކުރާރުކޮށް އެދިވަޑައިގަތެވެ.
