ފެލިދޫދާއިރާއަށް ވާދަކުރައްވާ ކެންޑިޑޭޓުންގެ ތެރެއިން އެމަނިކުފާނުގެ ފުރިހަމަ އިތުބާރާއި ސަތޭކަ ޕަރސެންޓް ތާއީދުއޮތް ހަމައެކަނި ކެންޑިޑޭޓަކީ އާދަމް ޒާހިރު ކަމަށް ރައީސުލްޖުމުހޫރިއްޔާ ޑރ މުހައްމަދު މުއިއްޒު ވިދާޅުވެއްޖެއެވެ.
ރައީސް މިގޮތަށް ވިދާޅުވީ ފެލިދޫ ދާއިރާގެ ސަރުކާރު ކެންޑިޑޭޓު އާދަމް ޒާހިރުގެ މާލޭ ޖަގަހަ ހުޅުވުމުގެ ހަފުލާގައި ވާހަކަފުޅު ދައްކަވަމުންނެވެ.
ރައީސް ވިދާޅުވީ ބައެއް ފަރާތްތަކުން ވަރަށް ބޮޑަށް މިކަން އޮޅުވާލަން މަސައްކަތް ކުރައްވާ ކަމަށާއި ނަމަވެސް އެ ވާހަކަތައް ރައްޔިތުން ގަބޫލުނުކުރުމަކީ ވަރަށް ބޮޑު އެދުމެއް ކަމަށެވެ.
“ ވަރަށް ސާފުކޮށް މިދަންނަވަނީ އެހެން ކެންޑިޑޭޓެއް ނެތް ފެލިދޫ ދާއިރާގައި އަޅުގަނޑުގެ ތާއީދު އޮތް. އަޅުގަނޑުގެ ފުރިހަމަ ތާއީދާއި ސަތޭކަ ޕަރސެންޓް އިތުބާރު އޮތް ކެންޑިޑޭޓަކީ އާދަމް ޒާހިރު. ކެންޑިޑޭޓު ނަމްބަރު ހަތަރެއް “. ރައީސް ވިދާޅުވިއެވެ.
ރައީސުލްޖުމުހޫރިއްޔާ އިތުރަށް ވިދާޅުވީ ވ އަތޮޅާއި ފެލިދޫ ދާއިރާގެ ތަރައްގީއަށް މިފަދަ ރަނގަޅު ފުރުސަތެއް ލިބި ސަރުކާރާއެކު މަސައްކަތް ކުރުމަށް ޒުވާން ޖޯޝު ހުރި ކެންޑިޑޭޓަކު ދެއްކުމުން ރައްޔިތުންގެ ވޯޓުން މަޖިލީހަށް ހޮއްވަވާ ދެއްވުމަކީ އެމަނިކުފާނުގެ ވަރަށް ބޮޑު އެދުމެއް ކަމަށެވެ.