އަލިފާނުގެ ހާދިސާ ހިނގި މ. ރަބީއުވިލާ ގެ ތަޅާލުމުގެ މަސައްކަތް ވަރަށް އަވަހަށް ފަށާނެ ކަމަށް ސަރުކާރުން ހާމަކޮށްފިއެވެ.
މިނިސްޓަރ އޮފް ސިޓީސް ލޯކަލް ގަވަރމަންޓް އެންޑް ޕަބްލިކް ވޯރކްސް އާދަމް ޝަރީފު ވިދާޅުވީ މިރޭ އަލިފާނުގެ ހާދިސާ ހިނގި ގެއަކީ މީހުން ދިރިނޫޅޭތާ ގިނަ ދުވަސްވެފައިވާ ބޮލަށް ވެއްޓޭ ވަރަށް ބާވެފައިވާ ގެ އެއް ކަމަށެވެ.
މަގުމަތީ ހިނގާ ބިނގާވެ އުޅޭ ފަރާތްތަކަށް ނުރައްކާތެރި ހާދިސާއެއް މެދުވެރިވެދާނެ ކަމަށްޓަކައި ސަރުކާރުގެ ކަމާގުޅުންހުރި ފަރާތްތަކާއި ވާހަކަދައްކައިގެން އެ އިމާރާތް ތަޅާލުމުގެ މަސައްކަތް ވަރަށް އަވަހަށް ކުރިއަށް ގެންދާނެ ކަމަށް މިނިސްޓަރ އާދަމް ޝަރީފު ވިދާޅުވިއެވެ.
ކެނެރީމަގުގައި ހުންނަ އެގޭގައި ރޯވެފައިވަނީ 4 ވަނަ ފަންގިފިލާގައެވެ.
އެމްއެންޑީއެފުން ބުނެފައިވަނީ މިހާދިސާގެ ރިޕޯޓު ލިބިފައިވަނީ މިރޭ 20:19ގައި ކަމަށެވެ. މިހާދިސާ ހިނގި ސަބަބު އަދި ދެނެގަނެވިފައި ނުވިނަމަވެސް އެމްއެންޑީއެފުން ވަނީ އެގޭގައި ރޯވި އަލިފާން ކޮންޓްރޯލްކޮށްފައެވެ.