ފ. ނިލަންދޫ ހޮސްޕިޓަލްގެ އާ އިމާރާތުގެ މަސައްކަތް ކުރުމަށް މިހާރުވަނީ އެމްއޯޔޫގައި ސޮއިކުރެވިފައިކަމަށް ހެލްތް މިނިސްޓަރ ޑރ. އަބްދުﷲ ޙަލީލް ވިދާޅުވެއްޖެ އެވެ.
ރޭ ނިލަންދޫ ރައްޔިތުންނާއި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ބައްދަލުކުރައްވާ ބޭއްވި ޖަލްސާގައި ވާހަކަފުޅުދައްކަވަމުން ޙަލީލް ވަނީ ރައީސް ޑރ. މުހައްމަދު މުއިއްޒު ނިލަންދޫއަށް މީގެކުރިން ކުރެއްވި ދަތުރުފުޅުގައި ނިލަންދޫގެ އަދި ހާއްސަކޮށް ފ. އަތޮޅާއި އެ ސަރަހައްދުގެ ސިއްހީ ނިޒާމު ތަރައްޤީކޮށްދެއްވާނެ ވާހަކަ ދެންނެވިކަމަށް ވިދާޅުވެފައެވެ.
ޙަލީލް ވިދާޅުވިގޮތުގައި މިހާރު ކުރިއަށް ދަނީ އެ އެމްއޯޔޫގެ ދަށުން ޑިޒައިނކުރުމާއި ޤާއިމްކުރަންޖެހޭ ބައެއް ހިދުމަތްތައް ދެނެގަތުން ފަދަ ތަފްޞީލީ މަސައްކަތްތަކެވެ. އަދި އަހަރު ދުވަސްތެރޭގައި އެ މަސައްކަތް ފަށާނެކަމަށް ޙަލީލް ވަނީ ވިދާޅުވެފައެވެ.
“މި ޕްރޮޖެކްޓްގެ ފައިނަލް ކޮންޓްރެކްގައި ސޮއިކުރުމަށް ދެން މާ ގިނަ ދުވަސްތަކެއް ނުނަގާނެ.” ޙަލީލް ވިދާޅުވިއެވެ.
ހަމައެހެންމެ ރައީސްގެ އިރުޝާދުގެ ދަށުން ނިލަންދޫގައި ޑައިލެސިސްގެ ހިދުމަތްވެސް ޤާއިމްކުރެވިގެންދާނެކަމަށް ޙަލީލް ވަނީ ވިދާޅުވެފައެވެ. އަދި އާ އިމާރާތުގައި ބައެއް ސިއްހީ އެހެން ފަންޑުތަކުގެ ހިދުމަތް ތައާރަފްކުރުމާއެކު އެނދުތައްވެސް އިތުރުވެގެންދާނެކަމަށް ޙަލީލް ވަނީ ވިދާޅުވެފައެވެ.
މިއަދު ރާއްޖޭގެ ސިއްހީ ނިޒާމުގައި ރައީސް އެންމެ އިސްކަންދެއްވާ މަސައްކަތްޕުޅަކީ ޕްރައިމަރީ ހެލްތް ކެއާގެ ނިޒާމު ވަރުގަދަކުރުންކަމަށެވެ. އަދި ފ. އަތޮޅަކީ ޑަބްލިޔުއެޗްއޯގެ އެހީތެރިކަމާއެކު ޕްރައިމަރީ ހެލްތް ކެއާގެ ވަރަށް ބޮޑު މަސައްކަތްތަކެއް ކުރައްވަމުންދާ އަތޮޅެއް ކަމަށް ޙަލީލް ވަނީ ވިދާޅުވެފައެވެ.
މިނިސްޓަރ ވަނީ ރާއްޖެއިން ގައިން ގަޔަށް ނާރާ ބަލިތަކަށް ސިއްހީ ނިޒާމުން ކުރަަންޖެހޭ ހޭދަ 85 އިންސައްތައަށް އަރާ ކަމަށް ވެސް މިނިސްޓަރު ވިދާޅުވިއެވެ. ގައިގަން ގަޔަށް ނާރާ ބަލިތައް ނައްތާލެވޭނީ ޕްރައިމަރީ ހެލްތް ކެއާ ރަނގަޅުކޮށްގެންކަން މިނިސްޓަރު ފާހަގަކުރެއްވިއެވެ.
އަދި ސިއްހީ ނިޒާމު ވަރުގަދަކުރުމަށްޓަކައި ޕްރަމަރީ ހެލްތް ކެއަރ ވަރުގަދަ ކުރުމަށް ސަރުކާރުން މަސައްކަތް ކުރަމުންދާ ކަމަށް ވެސް މިނިސްޓަރު ވިދާޅުވިއެވެ. އެގޮތުން، އެ ނިޒާމު 5 އަތޮޅެއްގައި ފުޅާކުރުމަށް މިނިސްޓްރީން ހުށަހެޅުއްވި ނަމަވެސް އަދި 5 އަތޮޅުގެ ނަން މަދުކަމަށް ވިދާޅުވެ، ރައީސްގެ ލަފާފުޅު މަތިން މިހާރު 10 އަތޮޅެއްގައި ޕްރައިމަރީ ހެލްތް ކެއަރ ފަށަން ސަރުކާރުން ނިންމާފައިވާ ކަމަށް މިނިސްޓަރު ވިދާޅުވިއެވެ.