ރައްޔިތުންނަށް ލިބިފައިވާ އިންތިޚާބީ ހައްޤު ވީހާވެސް އަވަހަށް ބޭނުންކޮށް ވޯޓުލުމުގެ ކަންކަން ނިންމަވާލެވުމަށް ރައީސުލްޖުމުހޫރިއްޔާ ޑރ މުހައްމަދު މުއިއްޒު އިލްތިމާސްކުރައްވާފިއެވެ.
ރައީސުލްޖުމުހޫރިއްޔާ ޑރ. މުޙައްމަދު މުޢިއްޒު މިކަމަށް އިލްތިމާސްކުރެއްވީ ރައްޔިތުންގެ މަޖިލީހުގެ އިންތިޚާބުގައި ވޯޓު ލެއްވުމަށްފަހުއެވެ.
މިއަދު 8:00 ޖެހިއިރު އިންތިޚާބުގެ ވޯޓުލުން ފެށިގެން ދިޔައިރު، ރައީސުލްޖުމްހޫރިއްޔާ ވޯޓު ލައްވާފައިވަނީ ތާޖުއްދީން ސްކޫލުގައި ބެހެއްޓިފައިވާ ވޯޓު ފޮށްޓަކަށެވެ. އެމަނިކުފާނު ވޯޓު ލެއްވުމަށް ވަޑައިގެންފައިވަނީ 8:40 ހާއިރެވެ.
ވޯޓު ލެއްވުމަށްފަހު ރައީސުލްޖުމުހޫރިއްޔާ ޑރ. މުޙައްމަދު މުޢިއްޒު ވިދާޅުވީ، ވޯޓުލުމަކީ ކޮންމެ ރައްޔިތަކަށްވެސް ޤާނޫނު އަސާސީން ލިބިދީފައިވާ ހައްޤެއް އަދި ޒިންމާއެއް ކަމަށާއި އެހެންވީމަ ހުރިހާ ރައްޔިތުންވެސް ނިކުމެވަޑައިގެން ވީހާވެސް އަވަހަކަށް ވޯޓުލުމުގެ ހައްޤު އަދާކޮށްދިނުމަށް އެދޭ ކަމަށެވެ.
“ކޮންމެހެން ހަވީރު ވަންދެން މަޑު ނުކުރައްވާ، އެބޭފުޅަކު ވޯޓުލައްވަން ޖެހޭ މަރުކަޒަކަށް ވަޑައިގެން ވޯޓުލެއްވުމަކީ އެ ބޭފުޅެއްގެ ހައްޤެއް އަދި ޒިންމާއެއްވީމަ، އަޅުގަނޑު އެކަމަށް އިލްތިމާސްކުރަން.” ރައީސް ޑރ. މުޢިއްޒު ވިދާޅުވިއެވެ.
މިއަދު ކުރިއަށްދާ 20 ވަނަ ރައްޔިތުންގެ މަޖިލީހުގެ އިންތިޚާބުގައި ވެރިކަން ކުރާ ޕީއެންސީން 90 ދާއިރާއަކަށް ކެނޑިޑޭޓުން ނެރެފައިވެއެވެ.
