މި ހަފުތާގެ ބުދަ ދުވަހުން ފެށިގެން ރާއްޖެއަށް މޫސުން ގޯސްވާނެ ކަމަށް މޫސުމާ ބެހޭ ގައުމީ އިދާރާ (މެޓް) އިން މިއަދު ބުނެފި އެވެ.
މެޓުން ވަނީ މާދަމާގެ ނިޔަލަށް ޖުމްލަކޮށް ކެރީގެ އަސަރު ރާއްޖޭގެ ބޮޑު ސަރަހައްދަކަށް ކުރާނެ ކަމަށާއި އަދި އޭގެ ފަހުން ބުރާސްފަތި، ހުކުރު، ހޮނިހިރު އަދި އާދިއްތަ ދުވަހު ރާއްޖޭގެ ބޮޑު ސަރަހައްދަކަށް ވިއްސާރަ ކުރާނެ ކަމަށް ބުނެފައެވެ.
ކުރިއަށް އޮތް ފަސް ދުވަހު ވައި ޖެހޭނެ ކަމަށް ލަފާ ކުރެވެނީ ހުޅަނގުދެކުނާއި ހުޅަނގުން ގަޑިއަކު 8-18 މޭލު ބާރުމިނުގައި އަދި ވިލާގަނޑުގައި ގަޑިއަކު 35-40 މޭލަށެވެ. އެހެންކަމުން ކަނޑުތައް އާދައިގެ ވަރަކަށް ގަދަވެފައި ވިލާގަނޑުގައި ގަދަވާނެ އެވެ.
މީގެއިތުރުން މެޓުން ވަނީ މާދަމާ ރޭ ކަނޑުދަތުރު ކުރާ ފަރާތްތަކަށް އުނދަގޫތަކެއް ކުރިމަތިވި ނަމަވެސް ކުރިއަށް އޮތް ދުވަސްތަކުގައި ކަނޑުދަތުރުތަކަށް އުނދަގުލެއް ނުވާނެ ކަމަށް ބުނެފައެވެ.
މާދަމާ އިން ފެށިގެން މޫސުން ގޯސްވާނެ ކަމަށް މެޓް އޮފީހުން ލަފާކޮށްފައިވާއިރު، އެ ދުވަސްތަކަކީ ގިނަ ބަޔަކު ޢީދު ބަންދު ނިންމާލުމަށްފަހު ދަތުރު ކުރާނެ ދުވަސްތަކެއް ކަމަށް ބެލެވެ އެވެ.