މިއަހަރުގެ ޙައްޖުގެ މަތިވެރި އަޅުކަން އަދާކުރުމަށް ސަޢުދީ ޢަރަބިއްޔާއަށް ދިޔަ ދިވެހި ޙައްޖުވެރިންގެ ފުރަތަމަ ގުރޫޕު އަންނަ ހޯމަ ދުވަހު ރާއްޖެ އައުމަށް ފުރާނެކަމަށް އިސްލާމީ ކަންތައްތަކާބެހޭ ވުޒާރާއިން ހާމަކޮށްފިއެވެ.
ޙައްޖުގެ އަޅުކަން އަދާކުރުމަށް 1150 ދިވެހި ޙައްޖުވެރިން މިއަހަރު ސަޢުދީއަށް ގޮސްފައިވެއެވެ. އެގޮތުން ދިވެހި ޙައްޖުވެރިންގެ ތެރޭގައި ސަރުކާރުގެ އެހީގައި ޙައްޖަށް ގެންދިޔަ، އަމިއްލައަށް ޙައްޖަށް ދިއުމުގެ ކެރިފޯރުންތެރިކަން ލިބިފައިނުވާ 50 މީހުން ހިމެނެއެވެ.
އިސްލާމީ ކަންތައްތަކާބެހޭ ވުޒާރާއިން ބުނީ، ޙައްޖުގެ އަޅުކަން އަދާކުރުމަށް ދިޔަ ހުރިހާ ދިވެހިންވެސް ޙައްޖުގެ އަޅުކަން އަދާކުރުމަށްފަހު އަނބުރާ ރާއްޖެ އައުމަށް މިހާރު ތައްޔާރުވެފައިވާ ކަމަށެވެ. އެގޮތުން ޙައްޖުވެރިން އެނބުރި ރާއްޖެ އަންނާނީ 4 ފްލައިޓެއްގައިކަމަށް އެ ވުޒާރާއިން ހާމަކުރެއެވެ.
ރާއްޖެ އައުމަށް ޙައްޖުވެރިން ފުރާ ދުވަސްތައް:
މިމަހުގެ 24 ވަނަ ދުވަސް
މިމަހުގެ 28 ވަނަ ދުވަސް
އަންނަ މަހުގެ 1 ވަނަ ދުވަސް
އަންނަ މަހުގެ 4 ވަނަ ދުވަސް
އެ ވުޒާރާއިން ބުނީ، ދިވެހި ޙައްޖުވެރީންގެ ތެރެއިން މިހާތަނަށް 1 ޙައްޖުވެރިޔަކު ނިޔާވެފައިވާ ކަމަށެވެ. އަދި މިވަގުތު ހޮސްޕިޓަލުގައި 1 ޙައްޖުވެރިއަކަށް ފަރުވާ ދެމުންދާއިރު، ޢާންމު ގޮތެއްގައި ހުރިހާ ޙައްޖުވެރިންގެ ޙާލު ރަނގަޅުކަމަށެވެ.