ސަރުކާރު ހިންގާ މައި ޕާޓީ، ޕީޕަލްސް ނެޝަނަލް ކޮންގްރެސް (ޕީއެންސީ) ގެ ޖަގަހަ (ޕީއެންސީ ހައުސް) ރަސްމީކޮށް ހުޅުވައިފިއެވެ.
އާރޓިފިޝަލް ބީޗު ކުރިމަތީ ހުންނަ ހ.ވެޔޮވިލާގައި ޕީއެންސީ ޖަގަހަ ރަސްމީކޮށް ހުޅުވައިދެއްވީ ޕީއެންސީގެ ރައީސް، ދިވެހިރާއްޖޭގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއެވެ.
ޖަގަހަ ހުޅުވުމަށް ކުރިއަށްދިޔަ ރަސްމިއްޔާތުގައި ޕީއެންސީގެ ގިނަ އަދަދެއްގެ ސަޕޯޓަރުން ވަނީ ބައިވެރިވެފައެވެ. ރައީސް އެ ސަރަހައްދަށް ވަޑައިގެންނެވި އިރު ސަލާމް ކުރެއްވުމަށް ހަދާފައިވާ ކިއު ޖަގަހައިން ފެށިގެން ކިންގް ސަލްމާން މިސްކިތާއި ހަމައަށް ފޯރައެވެ. ރައީސް ޖަގަހާއި ހަމައަށް ވަޑައިގެންނެވީ އެ ހުރިހާ ފަރާތްތަކާއި ސަލާމަތް ކުރެއްވުމަށް ފަހުގައެވެ.
ކުލަގަދަކޮށް ކުރިއަށްގެންދިޔަ އެ ރަސްމިއްޔާތުގައި ޕީޕީއެމް/ޕީއެންސީގެ ލީޑާޝިޕްގެ ބޭފުޅުންގެ އިތުރުން ސިޔާސީ އިސް ސަފުގައި ފާހަގަކޮށްލެވޭ އެހެން ލީޑަރުން ވެސް ބައިވެރިވެވަޑައިގަންނަވައެވެ. އެގޮތުން އެމްއެންޕީގެ ލީޑަރު މުހައްމަދު ނާޒިމް އަދި އެމްޑީއޭގެ ލީޑަރު އަހުމަދު ސިޔާމް ވެސް ބައިވެރިވެވަޑައިގެންނެވިއެވެ.