މިއަދު ވެރިކަމުގައި އޮތް ޕީއެންސީއާއި ޕީޕީއެމްއިން މަސައްކަތްކުރަމުންދަނީ ހަރުދަނާ ލީޑަރޝިޕެއްގެ ދަށުންކަމަށާއި، ސިޔާސީގޮތުން ސަރުކާރު ބަލިކޮށްލުމަކީ ވާނޭކަމެއް ނޫންކަމަށް ރައްޔިތުންގެ މަޖިލީހުގެ ރައީސް އަދި ޕީއެންސީގެ ޗެއަރޕާސަން އަބްދުއްރަހީމް ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ޕީއެންސީގެ މައި ޖަގަހަ “ޕީއެންސީ ހައުސް” ހުޅުވުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ.
އަބްދުއްރަހީމް ވިދާޅުވީ ސަރުކާރަށް ސިޔާސީގޮތުން މިއަދު ކާމިޔާބީތައް ހާސިލުވަމުންދާ އެންމެ ބޮޑު ސަބަބަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ލީޑަރޝިޕްގެ ހަރުދަނާކަން ކަމަށެވެ.
“ޕީއެންސީ ހައުސް” ހުޅުވުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުން އަބްދުއްރަހީމް ވަނީ ރާއްޖޭގައި މީގެކުރިން ވެރިކަންކުރެއްވި ބޭފުޅުން ޕާޓީއާއި ސަރުކާރު ހިންގެވި ގޮތާއި ރައީސް މުއިއްޒު ވެރިކަން ހިންގަވާ ގޮތުގައި ހުރި ތަފާތުތަކަށް އަލިއަޅުއްވާލައްވާފައެވެ. އެގޮތުން މީގެކުރިން ވެރިކަން ކުރެއްވި ބޭފުޅުން ސިޔާސީ ގޮތުން ކުރެއްވި ކަންކަމުގެ ސަބަބުން ޕާޓީއާއި ސަރުކާރަށް ގެއްލުންތަކެއް ލިބުނުކަން އަބްދުއްރަހީމް ފާހަގަކުރެއްވިއެވެ.
އަބްދުއްރަހީމް ވިދާޅުވީ ރައީސް މުއިއްޒުއަކީ މީގެކުރިން ވެރިކަން ކުރެއްވި ބޭފުޅުންނާއި އަޅާބަލާއިރު ވަރަށް ތަފާތު ބޭފުޅުންތަކެއްކަމަށެވެ. އެގޮތުން ސިޔާސީގޮތުން ބޮޑު ކަމެއް ދިމާވުމުން އެމަނިކުފާނު އަބަދުވެސް ޕާޓީގެ ލީޑަރޝިޕްއާއެކު މަޝްވަަރާކުރައްވާކަމަށާއި، އަދި އެއީ ސަރުކާރަށް ލިބޭ ކާމިޔާބީގެ ސިއްރުކަމަށް އަބްދުއްރަހީމް ވިދާޅުވިއެވެ.
އަބްދުއްރަހީމް ވިދާޅުވީ ސިޔާސީ ބޭފުޅުންވެސް މިއަދު އެންމެ ރަނގަޅުވާނީ ރައްޔިތުންގެ ނިންމުތަކަށް އިހްތިރާމްކޮށް، ސަރުކާރަށް ޖެއްސުން ކުރުމުގެ މަސައްކަތް ހުއްޓާލުންކަމަށެވެ.