ހުޅުމާލެ ދޭއްގެ، ރުއްގަނޑު 3ގެ ބީޗް ސަރަހައްދުގައި ލޮޓްތަކުގެ ތެރޭގައި ޤަވާއިދާއި ހިލާފަށް ވިޔަފާރި ކުރުމަކީ މަނާކަމެއް ކަމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ބުނެފިއެވެ.
އެޗްޑީސީއިން މިއަދު ކުރި އިއުލާނެއްގައި ވަނީ ފޭސް ދޭއްގެ ބީޗު ސަރަހައްދުގައި އޮންނަ ހުސް ބިމުގައި ވިޔަފާރިކުރުމަށް ޤަވާއިދާއި ހިލާފަށް ހަދާފައިވާ ހަޓުތައް ނެގުމުންވެސް އެ ސަރަހައްދުގައި ހުރި އާންމުންގެ ލޮޓުތަކުގައި އަދިވެސް ޤަވާއިދާއި ހިލާފަށް ވިޔަފާރި ކުރަމުންދާކަން ފާހަގަކުރެވިފައިޥާކަމަށް ބުނެފައެވެ.
އަދި އެތަނުގައި ޤަވާއިދާއި ހިލާފަށް ވިޔަފާރިކުރުމަކީ މަނާކަމެއްކަން ހަނދާންކޮށްދީ، އެޗްޑީސީއިން ވަނީ ލޮޓްތަކުގެ ވެރިފަރާތްތަކުން އެކަމަށް ސަމާލުވުމަށް އެދިފައެވެ.
އެޗްޑީސީއިން މީގެކުރިން ވަނީ ފޭސް ދޭއްގެ ބީޗުގައި ހުރި ހަޓުތައް ނަގާ އެ ސަރަހައްދު އިތުރަށް ތަރައްގީ ކުރަން ނިންމާފައިވާ ކަމަށް ބުނެފައެވެ.