ޓްރެފިކް މައްސަލަ ހައްލު ކުރުމަށް ކުރިއަށް އޮތް ހަތަރު އަހަރު ތެރޭގައި ހުޅުމާލޭގައި މަދުވެގެން ހަތް ސުކޫލު އަޅުއްވާނެ ކަމަށް ރައީސް ޑރ. މުޙައްމަދު މުއިއްޒު މިއަދު ވިދާޅުވެއްޖެއެވެ.
އިތުރު ސްކޫލްތަކެއް ހުޅުމާލޭގައި އަޅަން ނިންމާފައިވާ ކަމުގެ ޔަގީންކަން ރައީސް ދެއްވީ، މާލޭ ސިޓީ ކައުންސިލާ ބައްދަލުކުރައްވަން އެ އިދާރާ އަށް މިއަދު ވަޑައިގެން ކައުންސިލަރުންނާ ވާހަކަފުޅު ދައްކަވަމުންނެވެ.
އެ ބައްދަލުވުމުގައި ވާހަކަދައްކަވަމުން އެމަނިކުފާނު ވިދާޅުވީ، ހުޅުމާލޭގެ ތިން ފިޔަވަހީގައި އާބާދުވާ ދެ ލައްކައަށް ވުރެ ގިނަ މީހުންގެ އާބާދީއަށް ބަލާއިރުގައި، މިހާރު ހުރި ސުކޫލުތަކާ އެއްކޮށް ހުޅުމާލޭގައި 22 ސުކޫލު ގާއިމުކުރުމަށް ބޭނުންފުޅުވާ ކަމަށެވެ.
“މި އަހަރާ އެކީގައި ކުރިއަށް އޮތް ހަތަރު އަހަރު، އަޅުގަނޑުމެން ބަލާނަން ކިތައް ސްކޫލުތޯ ހެދެނީ. މަދުވެގެން ހަތް ސްކޫލު ނޫނީ 10 ވަރަކަށް ސްކޫލް، ކުރިއަށް އޮތް ހަތަރު އަހަރު ތެރޭ އަޅާނެ،” ރައީސް ވިދާޅުވި އެވެ.
ހުޅުމާލެގައި އަލަށް ގާއިމުކުރާ ކޮންމެ ސުކޫލެއްގައި 1500 އެއްހާ ކުދިންނަށް ކިޔެވޭނެ ޖާގަ ހުންނާނެ ކަމަށް ރައީސް ވަނީ ވިދާޅުވެފައެވެ. އެ ސުކޫލުތައް ގާއިމުކުރުމަށް ބޮޑު ބަޖެޓެއް ހިނގި ނަމަވެސް، އެކަމަށް އިސްކަން ދެއްވާނެ ކަމަށް އެމަނިކުފާނު ވިދާޅުވިއެވެ.
ރައީސް ވިދާޅުވީ ހުޅުމާލޭގައި އިތުރަށް 10 ސްކޫލު އެޅިއްޖެ ނަމަ ސިނަމާލެ ބްރިޖުގެ ޓްރެފިކަށް ވަރަށް ބޮޑު ލުޔެއް ލިބޭނެ އެވެ.