ރޭ މާލޭގައި އަންހެނަކު ރަހީނު ކުރި ހާދިސާގައި ހަރަކާތްތެރިވި ފުލުހުން އަމަލުކުރިގޮތް ތަހުގީގުކުރަން އަންގާފައެއް ނުވާނެކަމަށް ހޯމް މިނިސްޓަރ އަލީ އިހްސާން ވިދާޅުވެއްޖެ އެވެ.
ރޭގެ ހާދިސާ އާއި ގުޅުވައި ރާއްޖޭގެ ބައެއް ނޫސްތަކުން ވަނީ ރަހީނުކުރި އަންހެން މީހާ ސަލާމަތް ކުރަން ފުލުހުން ބާރުގެ ބޭނުން ކުރި ގޮތުގެ އެތެރޭގެ ތަހުގީގެއް ހިންގަން އަންގާފައިވާކަމަށް ބުނެފައެވެ.
މި ހަބަރު ދޮގުކުރައްވަމުން މިނިސްޓަރ އިހްސާން ވަނީ ފުލުހުން ކުރެއްވީ ހިތްވަރުގަދަ މަސައްކަތެއް ކަމަށް ވިދާޅުވެފައެވެ. އަދި އެކަމަށްޓަކައި ފުލުހުންނަށް ސާބަސް ދެއްވަމުން މިނިސްޓަރ ވަނީ އެ ހާދިސާގައި ހަރަކާތްތެރިވި ފުލުހުން އަމަލުކުރިގޮތް ތަހުގީގުކުރަން އަންގާފައެއް ނުވާނެކަމަށް ވިދާޅުވެފައެވެ.
މިނިސްޓަރ އިހުސާންގެ އިތުރުން ކޮމިޝަނަރ އޮފް ޕޮލިސް ޢަލީ ޝުޖާޢުވެސް ވަނީ ރޭ މާލޭގައި އަންހެނަކު ރަހީނު ކުރި ހާދިސާގައި ހަރަކާތްތެރިވި ފުލުހުން އަމަލުކޮށްފައިވާ ގޮތާއި މެދު ފަހަރުވެރިވާ ކަމަށާއި އެއީ ކާމިޔާބު އޮޕަރޭޝަނެއް ކަމަށް ވިދާޅުވެފައެވެ.
މި އޮޕަރޭޝަންގައި ހަރަކާތްތެރިވި ފުލުހުންނާ ބައްދަލުކުރައްވާ ދެއްކެވި ވާހަކަފުޅުގައި ސީޕީވަނީ މިއީ އަލަށް ދިމާވި ނުރައްކާތެރި ހާދިސާއެއް ނަމަވެސް ވަރަށް ކާމިޔާބު ކަމާއި ޕްރޮފެޝަނަލް ކަމާއެކު “ތުރެޓް ނިއުޓްރަލައިޒް” ކޮށްފައިވާ ކަމަށް ވިދާޅުވެފައެވެ. އަދި މިއީ ކާމިޔާބު މަސައްކަތެއްކަން ފާހަގަކޮށް ސީޕީ ވަނީ އެކަމުގައި ހަރަކާތްތެރިވި އެންމެންނަށް ޝުކުރު ދަންނަވާފައެވެ.
ސީޕީ ވަނީ އިރާދާފުޅާ އެކު ވިކްޓިމްއަށް އަދި ސަސްޕެކްއަށްވެސް ބޮޑު އަނިޔާއެއް ނުވެ ނިއުޓްރަލައިޒް ކުރެވުނު ކަންވެސް ފާހަގަކުރައްވާފައެވެ.
ސީޕީ ވިދާޅުވީ މި ހާދިސާގައި ފުލުހުން އަމަލުކޮށްފައިވާ ގޮތާމެދު ފަހުރުވެރިވާ ކަމަށާއި، މިއީ ރައްޔިތެއްގެ ފުރާނަ ސަލާމަތް ކުރަން ކުރަންޖެހޭ މަސައްކަތެއް ކުރުމުގައި ފުލުހުން ޖެހިލުން ނުވާނެކަމުގެ މިސާލެއް ކަމަށެވެ. މީގެއިތުރުން މިފަދަ ކަންކަމަށް ތައްޔާރުވުމުގެ ގޮތުން އިތުރު ތަމްރީންތައް ހަދަމުން ގެންދިއުން މުހިއްމުކަމަށްވެސް ސީޕީ ވިދާޅުވިއެވެ.
ރޭ އަންހެނަކު ރަހީނު ކުރި މީހާއަށް ލިބުނު އަނިޔާއަށް ފަރުވާދިނުމަށް ފަހު މިހާރުވަނީ ހޮސްޕިޓަލުން ދޫކޮށްލާފައެވެ. އަދި އޭނާ މިހާރު ހުރީ ފުލުހުންގެ ބެލުމުގެ ދަށުގައެވެ. ދިވެހި ފުލުހުންގެ ޚިދުމަތުން މި މައްސަލަ ސީރިއަސް މައްސަލައެއްގެ ގޮތުގައި ގެންދަނީ ތަހުގީގު ކުރަމުންނެވެ.