ފެނަކައިގެ ޗެއާޕާސަންގެ މަގާމަށް އެސްޓީއޯގެ މެނޭޖިން ޑިރެކްޓަރު ޝިމާދު އިބްރާހިމް ހަމަޖައްސައިފި އެވެ.
އަންނަ އަހަރުން ފެށިގެން ފެނަކަ، އެސްޓީއޯގެ ދަށަށް ބަދަލުކުރަން ނިންމައި، ފެނަކަ، އެސްޓީއޯ އަދި ފިނޭންސް މިނިސްޓްރީ ގުޅިގެން އަންނަނީ އެ ކަމަށް ބޭނުންވާ ޕްލޭނެއް އެކުލަވައިލަމުންނެވެ. އެސްޓީއޯގެ ދަށަށް ފެނަކަ ބަދަލުކުރަން ނިންމީ ފެނަކައިގެ ދަރަނީގެ މައްސަލަ ބޮޑުވެގެންނެވެ.
ޝިމާދުގެ އިތުރުން ޕީސީބީން ވަނީ އެސްޓީއޯގެ ޗީފް ފައިނޭންޝަލް އޮފިސަރު (ސީއެފްއޯ) މުހައްމަދު ނިޒާމާއި ފިނޭންސް މިނިސްޓްރީގެ ސްޓޭޓް މިނިސްޓަރު އަހުމަދު މާޒިން ވެސް ފެނަކައިގެ ބޯޑަށް އައްޔަންކޮށްފަ އެވެ.
އެސްޓީއޯގެ ދަށުން ފެނަކަ ހިންގަން ފަށަންދެން އެ ކުންފުނި ހިންގާ އިންޓެރިމް ބޯޑުގައި ހިމެނޭނީ އެސްޓީއޯއާއި ފިނޭންސް މިނިސްޓްރީ އަދި އެންވަޔަރަމަންޓް މިނިސްޓްރީން ކަނޑައަޅާ ބޭފުޅުންނެވެ.
އެއް ކުންފުންޏަކުން އެސްޓީއޯ އަށް މިވަގުތު އެންމެ ބޮޑު އަދަދެއްގެ ދަރަނި ދައްކަން ޖެހިފައި އޮތީ ފެނަކައިންނެވެ. ފެނަކަ އިން ތެޔޮ ގަނެގެން އެސްޓީއޯ އަށް ދެ ބިލިއަން ރުފިޔާ ދައްކަން އެބަ އޮތެވެ.