ރާއްޖޭގައި 15 އަހަރާއި 65 އަހަރާ ދެމެދުގެ 4.7 އިންސައްތަ މީހުންނަކީ ހިތުގެ ބަލި، ސްޓްރޯކް އަދި އެންޖީނާ ފަދަ ބަލިތައް ޖެހިފައިވާ މީހުން ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) ބުނެފި އެވެ.
ދުނިޔޭގެ ހިތުގެ ދުވަހާ ގުޅިގެން އެޗްޕީއޭއިން ވަނީ ރިޕޯޓެއް ނެރެފައެވެ. އެ ރިޕޯޓުގެ ބައެއް ތަފާސްހިސާބުތަކުގައިވާ ގޮތުން ހިތުގެ ބަލި ޖެހިގެން އެވަރެޖްކޮށް 17 މިލިއަން މީހުން މަރުވާ ކަމަށް ދުނިޔޭގެ ހިތުގެ ފެޑެރޭޝަނުން ވަނީ ލަފާކޮށްފައެވެ. އަދި އޭގެ މައިގަނޑު ސަބަބަކީ ކޮރޯނަރީ ހާޓް ޑިސީޒް، ނުވަތަ ސްޓްރޯކް ކަމަށް ބުނެފައިވެއެވެ.
ރާއްޖޭގައި ހިތުގެ ބަލިތައް އޮތް ހާލަތަށް ބަލާއިރު ގައިންގަޔަށް ނާރާ ބަލިތަކުގެ ހިރާސްތައް ދެނެގަތުމުށް 2020 އިން 2021 އަށް ރާއްޖޭގައި ހެދުނު “ނޮން ކޮމިއުނިކަބްލް ޑިޒީޒް ރިސްކް ފެކްޓަރ ސާވޭ 2020 -2021” އިން ދައްކާ ގޮތުގައި ރާއްޖޭގައި 15 އަހަރާއި 65 އަހަރާ ދެމެދުގެ 4.7 އިންސައްތަ މީހުންނަކީ ހިތުގެ ބަލި، ސްޓްރޯކް އަދި އެންޖީނާ ފަދަ ބަލިތައް ޖެހިފައިވާ މީހުން ކަމަށެވެ. އަދި 27.7 އިންސައްތަ މީހުންނަކީ މި ބަލިތަކަށް ދިގު މުއްދަތަށް ބޭސް ބޭނުން ކުރަމުންދާ މީހުން ކަަމަށްވެސް އެ ސާވޭގައި ބުނެފައިވެ އެވެ.
މި ދިރާސާގެ ބައިވެރިންގެ މެެދުގައި ނެގި ރިސްކް އެސެސްމެންޓުން ދައްކާ ގޮތުގައި:
40 އަހަރާއި 69 އަހަރާ ދެމެދުގެ މީހުންނަށް (ތިން ޕަސެންޓު ފިރިހެނުންނާއި 1.4 ޕަސެންޓު އަންހެނުން) 10 އަހަރުތެރޭ ހިތުގެ ބަލި ޖެހުމުގެ ފުރުސަތު ބޮޑު
7.7 ޕަސެންޓު މީހުންނަށް (7.5 ޕަސެންޓު ފިރިހެނުންނާއި 7.9 ޕަސެންޓު އަންހެނުން) ހިތުގެ ބަލި ޖެހުމުގެ 10 ޕަސެންޓާއި 20 ޕަސެންޓާ ދެމެދުގެ ފުރުސަތެއް އެބައޮތް
ހިތުގެ ބަލި ޖެހުމުގެ ފުރުސަތު އޮތް 61.8 ޕަސެންޓު މީހުންނަށް (50.4 ޕަސެންޓު ފިރިހެނުންނާއި 82.7 ޕަސެންޓު އަންހެނުން) ބަލި ޖެހުމުން ދުރުކުރުމަށް ޑްރަގް ތެރަޕީ އާއި ކައުންސެލިން ބޭނުންވޭ
ހިތުގެ ބަލީގެ ސަބަބުން ބަލި ޖެހޭ މީހާއަށާއި އަދި ބަލިޖެހޭ މީހާގެ ޢާއިލާ ތަކަށާއި މުޖުތަމަޢަށް ވެސް އަސަރުކުރާ ކަމަށާއި އަދި ނަފްސާނީ ގޮތުންނާއި މާލީ ގޮތުންވެސް ވަރަށް ގިނަ ގޮންޖެހުންތައް ކުރިމަތިވާ ކަމަށް އެޗްޕީއޭ އިން ބުނެ އެވެ.
އަދި އެޗްޕީއޭއިން ވަނީ، ފުރިހަމަ ސިއްހަތެއްގައި ހުރުމަށް ގަދައަޅާ މަސައްކަތްކުރުމަށާއި، ހިތުގެ ބަލި ޖެހުމަށް މެދުވެރިވާ ކަންކަމަށް ސަމާލުކަންދީ، ހިތުގެ ބަލިތަކުން ދުރުވުމަށްޓަކައި އަޅަން ޖެހޭ ފިޔަވަޅުތައް އެޅުމަށް އަޒުމް ކަނޑައެޅުމަށް އިލްތިމާސްކޮށްފައެވެ.