މަތީ ތައުލީމަށް މިދިޔަ އޮގަސްޓް މަހުގެ ނިޔަލަށް ތޭރަހާހަށްވުރެ ގިނަ ދަރިވަރުންނަށް އެހީ ފޯރުކޮށް ދީފައިވާ ކަމަށް ހަޔަ އެޑިއުކޭޝަން މިނިސްޓްރީން ބުނެފި އެވެ.
ސަރުކާރުން ހިންގާ “ސަރުކާރު” ވެބްސައިޓްގައި ހަޔާ އެޑިޔުކޭޝަން، ލޭބާ އެންޑް ސްކިލްސް ޑިވެލޮޕްމަންޓް އިން ޝާއިއުކުރި ހަބަރެއްގައި ބުނީ އެ އަދަދަކީ މަތީ ތައުލީމު ހާސިލް ކުރަމުންދާ 13،866 ދަރިވަރުންނަށް މަލީ އެހީފޯރުކޮށް ދިނުމުގެ ގޮތުން ކޮށްފައިވާ ހަރަދު ކަމަށެވެ.
އެ މިނިސްޓްރީން ބުނީ ފުރަތަމަ ޑިގްރީ އާއި ސްކޮލަޝިޕް ސްކީމް އަދި ސްޓޫޑަންޓް ލޯނު ސްކީމްގެ ދަށުން ދަރިވަރުންނަށް ދިން އެހީގެ ޖުމްލަ އަދަދު 689،663،352ރ. އަށް އަރާ ކަމަށެވެ.
މަތީ ތައުލީމުގެ ފުރުސަތުތައް ދަރިވަރުންނަށް ފަހިކޮށްދިނުމަށް އަމާޒުކޮށް ހަޔާ އެޑިޔުކޭޝަނުން ދަނީ ގިނަ މަސައްކަތްތަކެއް ކުރަމުންނެވެ.
އެގޮތުން މިހާރު ވެސް ޖަޕާން، ތުރުކީ، މެލޭޝިޔާ، ޗައިނާ އަދި އިނގިރޭސިވިލާތް ފަދަ އެތައް ޤައުމެއްގެ އެންބަސީތަކާއި ޔުނިވާސިޓީތަކުގެ އިސްބޭފުޅުންނާއި ބައްދަލުކޮށް ، އެކްސްޗޭންޖް ޕްރޮގްރާމްތަކާއި، ސްކޮލަޝިޕް ފުރުޞަތުތަކާއި ގުޅޭ އެއްބަސްވުންތަކުގައި ސޮއިކުރަމު އަންނަ ކަމަށް ހަޔަ އެޑިއުކޭޝަނުން ބުންޏެވެ.
ސަރުކާރުގެ ސިޔާސަތުގެ ދަށުން މަތީ ތައުލީމު ހާސިލުކުރުމަށް ބޭނުންވާ މާލީ އެހީ ފޯރުކޮށްދިނުމާއި، މަސައްކަތްތެރިކަމުގެ ދާއިރާތަކުން ޒުވާނުން ތަމްރީނުކުރުމުގެ އެތަށް މަސައްކަތްތަކެއްވެސް މިނިސްޓްރީ ދަނީ ކުރަމުންނެވެ.