އަންނަ އަހަރަށް ސަރުކާރުން ހުށަހަޅާ ބަޖެޓަކީ އިންޓަރނޭޝަނަލް މަނިޓަރީ ފަންޑު (އައިއެމްއެފް)ގެ މިންގަނޑުތަކާ އެއްގޮތަށް ދިވެހިރާއްޖެއިން އެކުލަވާލި ފުރަތަމަ ބަޖެޓްކަމުގައި މާލީ ވަޒީރުގެ ނައިބު އަޙްމަދު ސާއިދު މުސްތަފާ ހާމަކުރައްވައިފިއެވެ.
ވެރިކަންކުރާ ޕާޓީ ޕީއެންސީން އިންތިޒާމުކޮށްގެން ބޭއްވި “ރައްޔިތުންގެ ސައްލާ” ގައި ވާހަކަފުޅު ދައްކަވަމުން ސާއިދު ވިދާޅުވީ މި ބަޖެޓަކީ އައިއެމްއެފްގެ ގަވަރމަންޓް ފައިނޭންސް ސްޓެޓިސްޓިކްސްއާ އެއްހަމައެއްގައި ތައްޔާރުކޮށް ހުށަހެޅޭ ފުރަތަމަ ބަޖެޓްކަމަށެވެ. މި ހަރުދަނާ އުސޫލުގެ ދަށުން ބަޖެޓް އެކުލަވާލުމުގެ ސަބަބުން އަންނަ އަހަރު 7 ބިލިއަނެއްހާ ރުފިޔާ ޚަރަދު ކުޑަކުރެވޭނެކަމަށްވެސް އޭނާ ފާހަގަކުރެއްވިއެވެ.
ސާއިދު އިތުރަށް ވިދާޅުވީ މި އަހަރުގެ ބަޖެޓް އެކުލަވާލުމުގައި ސަރުކާރުން ވަރަށް ގިނަ ކަންކަމަށް ރިއާޔަތްކޮށް، ފަންނީ ގިނަ މަސައްކަތްތަކެއް ކުރައްވާފައިވާ ކަމަށެވެ. މީގެ ތެރޭގައި ބަޖެޓަށް އާމްދަނީ އިތުރުކުރުމަށް އައު ގޮތްތައް ހޯދުމާއި، އެ ކަންކަން ތަންފީޒުކުރާނީ ރައްޔިތުންނަށް ބުރަ ނުވާނެ ގޮތަށްކަން ހިމެނޭކަމަށް އޭނާ ވިދާޅުވިއެވެ.
މީގެ އިތުރުން، އަންނަ އަހަރުގެ ބަޖެޓުގައި ނިޒާމީ ގޮތެއްގައި ކުރަމުން އަންނަ ޚަރަދުތައް ހަރުދަނާކޮށް، ރައްޔިތުންނަށް އެންމެ މަންފާކުރަނިވި ގޮތަށް އެ ޚަރަދުތައް ބައްޓަންކުރުމަށް އިސްކަންދީފައިވާކަމަށް ސާއިދު ވިދާޅުވިއެވެ. އަދި ރައީސުލްޖުމްހޫރިއްޔާގެ އިރުޝާދާއެކު ޚަރަދު ކުޑަކުރުމުގެ ފިޔަވަޅުތައް މި ބަޖެޓުގައި ހިމަނާފައިވާކަންވެސް އޭނާ ފާހަގަކުރެއްވިއެވެ.
“ރައްޔިތުންގެ ސައްލާ” އަކީ ޕީއެންސީން ކޮންމެ ހަފްތާއަކު އެއްފަހަރު ވަކި މައުޟޫއަކަށް އަމާޒުކޮށްގެން ބާއްވާ ބައްދަލުވުމެކެވެ.