ހޮނިހިރު ދުވަހު ޣައްޒާގައި ކާބޯތަކެތީގެ އެހީ އުފުލާ 109 އދ. ލޮރީ ވަރަށް އަނިޔާވެރިކޮށް ލޫޓުވާލާފައިވާކަމަށް ފަލަސްޠީނު ރެފިއުޖީންނަށް އެހީތެރިވާ އދ. އޭޖެންސީ (އަންރުވާ) އިން ބުނެފިއެވެ.
އެގޮތުން ދެކުނު ޣައްޒާއާ ދިމާވާ ގޮތަށް އިޒްރޭލުގެ ބެލުމުގެ ދަށުގައިވާ ކެރެމް ޝަލޯމް ކްރޮސިންގ ހުރަސްކުރުމަށްފަހު، 97 ލޮރީ ގެއްލި، ޑްރައިވަރުންނަށް ބަޑިން ބިރުދައްކާ އެހީ ބާލަން މަޖުބޫރުކުރިކަމަށް ބުނެފައިވެއެވެ. މިއީ މިފަދަ އެންމެ ނުރައްކާތެރި ހާދިސާތަކުގެ ތެރެއިން އެއް ހާދިސާކަމަށް އެ އެޖެންސީން ބުނެފައިވެއެވެ.
ލޮލަށް ފެނުނު މީހުން ބުނާ ގޮތުގައި މާސްކު އަޅައިގެން ތިބި ބަޔަކު ގްރެނޭޑް އުކައިގެން ކޮންވޮއިއަށް ހަމަލާދީފައިވެއެވެ.
އަންރުވާގެ ކޮމިޝަނަރ ޖެނެރަލް ފިލިޕް ލަޒަރީނީ މި ޢަމަލު ހިންގި ފަރާތްތަކެއް ފާހަގަކޮށްފައި ނުވިޔަސް، ޣައްޒާގައި، މަދަނީ އިންތިޒާމުތައް މުޅިން ނެތިގޮސްފައިވާ އެތަނަކީ މަސައްކަތްކުރަން ނުރައްކާތެރި މާހައުލަކަށް ވެފައިވާ ކަމަށް ބުނެފައިވެއެވެ.
އަދި އަވަސް ފިޔަވަޅުތަކެއް ނޭޅިއްޖެނަމަ، އިންސާނީ އެހީއަށް ބަރޯސާވެ ދިރިއުޅޭ ދެ މިލިއަން މީހުންނަށް ކާބޯތަކެތީގެ ދަތިކަން އިތުރަށް ގޯސްވާނެ ކަމަށް އަންރުވާއިން ބުނެފައިވެއެވެ.
އދ. އިން ތާއީދުކުރާ އެސެސްމަންޓެއްގައި މި މަހުގެ ކުރީކޮޅު އިންޒާރުދީފައިވަނީ އުތުރު ޣައްޒާގެ ސަރަޙައްދުތަކުގައި ބަނޑުހައިހޫނުކަން ފެތުރުމުގެ ވަރަށް ބޮޑު ފުރުޞަތެއް އޮތް ކަމަށެވެ.
ހޮނިހިރު ދުވަހުގެ ވަގަށް ނެގުމުގެ ހާދިސާ ފުރަތަމަ ރިޕޯޓުކުރީ ރޮއިޓަރސް ނިއުސް އޭޖެންސީންނެވެ. އެ އޭޖެންސީން ބުނާ ގޮތުގައި ޣައްޒާގައި ހުރި އަންރުވާގެ އޮފިޝަލަކު ބުނެފައިވަނީ އިޒްރޭލުގެ އޮތޯރިޓީތަކުން ކޮންވޮއިއަށް އަންގާފައިވަނީ މަގުކުރުކޮށް އެހެން ރާސްތާއަކުން ކެރެމް ޝަލޯމުން ފުރުމަށެވެ.
ޣައްޒާގެ ހަމާސް ހިންގާ އިންޓީރިއަރ މިނިސްޓްރީން ބުނެފައިވަނީ އެ މިނިސްޓްރީގެ ސެކިއުރިޓީ މުވައްޒަފުން އެހީގެ ޓްރަކުތައް ވަގަށް ނަގާ ގޭންގުތަކުގެ 20 އަށްވުރެ ގިނަ މެންބަރުން މަރާލާފައިވާ ކަމަށެވެ. މިއީ “ގަބީލާތަކުގެ ކޮމިޓީތަކާ” ގުޅިގެން ކުރި އޮޕަރޭޝަނެއް ކަމަށް ބުނެފައިވެއެވެ.
އިޒްރޭލުގެ ސިފައިންގެ ފަރާތުން މިކަމާ ގުޅޭ ގޮތުން އަދި އެއްވެސް އެއްޗެއް ބުނެފައެއް ނުވެއެވެ.