ބ. ކަމަދޫގައި ގާއިމުކުރި ޕޮލިސް ޕޯސްޓު ރަސްމީކޮށް ހުޅުވައި، ފުލުހުން ގާއިމުވެ ތިބެ ޚިދުމަތްދޭން ފަށައިފިއެވެ. މި ޕޯސްޓު ހުޅުވައިދެއްވީ ކޮމިޝަނަރ އޮފް ޕޮލިސް އަލީ ޝުޖާއު އާއި ކަމަދޫ ކައުންސިލުގެ ރައީސް ހަސަން ޒަރީރުއެވެ.
މި ރަސްމިއްޔާތުގައި ފުލުހުންގެ އިސް އޮފިސަރުންނާއި، ބ. އަތޮޅު ކައުންސިލުގެ ރައީސް، ކަމަދޫގެ މުއައްސަސާތަކުގެ މުވައްޒަފުން އަދި ރައްޔިތުން ބައިވެރިވިއެވެ. މީގެ ތެރޭގައި ޑެޕިއުޓީ ކޮމިޝަނަރ އޮފް ޕޮލިސް ފަރުހާދު ފިކުރީ އާއި އިސްމާއިލް ނަވީން ހިމެނެއެވެ.
މި ރަސްމިއްޔާތުގައި ކޮމިޝަނަރ އޮފް ޕޮލިސް ޢަލީ ޝުޖާޢު ދެއްކެވި ވާހަކަފުޅުގައި، އިއްޔެއަކީ ކަމަދޫގެ ރައްޔިތުންނަށާއި ޒިޔާރަތްކުރާ ފަރާތްތަކަށް އަމާންކަމާއި ރައްކާތެރިކަން ކަށަވަރުކުރުމަށް މުހިންމު ދުވަހެއްކަމަށެވެ. އަދި ކަމަދޫއަކީ އިޖުތިމާއީ ގުޅުން ބަދަހި، ކުށްމަދު ރަށެއްކަމަށާއި، މި ޕޯސްޓަކީ ކުށް ވިޔަނުދިނުމަށް ފުލުހުންނާއި ރައްޔިތުން ގުޅިގެން މަސައްކަތްކުރުމަށް ހުޅުވުނު ދޮރެއްކަމަށް ވިދާޅުވިއެވެ.
ކޮމިޝަނަރ އިތުރަށް ވިދާޅުވީ، ރާއްޖޭގެ ކޮންމެ ރަށެއްގައިވެސް ފުލުހުން ގާއިމުވެ ތިބުމަކީ މުހިންމުކަމެއްކަމަށާއި، ފުލުހުންގެ ގާނޫނުންވެސް އެކަން ލާޒިމުކުރާ ކަމަށެވެ. އަދި ކަމަދޫގައި ތިބޭ ފުލުހުންނަށް އަމާޒުކޮށް، މުޖުތަމައުގެ ދާޚިލީ ސަލާމަތާއި ރައްކާތެރިކަން ނެގެހެއްޓުމަށާއި، ޖިނާއީ ކުށްތައް ތަޙުޤީޤުކޮށް ޤާނޫނު ތަންފީޒުކުރުމަށް ފަހަތަށް ނުޖެހުމަށް އިލްތިމާސްކުރެއްވިއެވެ.