ރާއްޖޭގައި ހެލިކޮޕްޓަރު ޚިދުމަތް ފެށުމުގެ މަސައްކަތް ހަލުވިކަމާއެކު ކުރިއަށްދާ ކަމަށާއި، މި ޚިދުމަތް އަންނަ އަހަރުގެ މާރިޗު މަހުގެ ތެރޭގައި ފެށޭނެކަމަށް ޓްރާންސްޕޯޓު މިނިސްޓަރު މުޙައްމަދު އަމީން ވިދާޅުވެއްޖެއެވެ.
ޕީއެސްއެމްގެ “ހަފްތާ 52” ޕްރޮގްރާމްގައި ވާހަކަފުޅު ދައްކަވަމުން މިނިސްޓަރު ވިދާޅުވީ ކުރިއަށް އޮތް 10 ނުވަތަ 15 ދުވަހުގެ ތެރޭގައި ހެލިކޮޕްޓަރު އޮޕަރޭޓަރަކާއެކު އެއްބަސްވުމެއްގައި ސޮއިކުރެވޭނެ ކަމަށެވެ. އަދި މި ޚިދުމަތް ފެށިގެންދާނީ ސިވިލް އޭވިއޭޝަންގެ ހުރިހާ މިންގަނޑުތަކަކަށް ފެތޭ ގޮތަށް ކަމަށްވެސް އެމަނިކުފާނު ވިދާޅުވިއެވެ.
މިނިސްޓަރުގެ ވާހަކަފުޅުގައި، ރާއްޖޭގައި އޮޕަރޭޓްކުރާނީ އިނގިރޭސިވިލާތުގެ ސީއޭއޭގެ ހުށަހެޅުންތަކާ އެއްގޮތަށް، ސަލާމަތީ ގޮތުން އެންމެ މަތީ ފެންވަރުގެ ހެލިކޮޕްޓަރުތައް ކަމަށް ފާހަގަކުރެއްވިއެވެ. މި ޚިދުމަތް ފެށުމުން، އެއް ރަށުން އަނެއް ރަށަށް ނުވަތަ މާލެއަށް ގެންނަންޖެހޭ ބަލިމީހުންގެ ދަތުރުފަތުރަށް ފަސޭހަވެގެންދާނެ ކަމަށާއި، ރޭގަނޑު ޓޫރިސްޓުން އުފުލުމުގައި ދިމާވާ ދަތިތަކަށްވެސް ޙައްލު ލިބިގެންދާނެ ކަމަށް މިނިސްޓަރު ވިދާޅުވިއެވެ.
ރާއްޖޭގައި ހެލިކޮޕްޓަރު ޚިދުމަތް ތަޢާރަފުކުރުމުގެ މައިގަނޑު މަޤްޞަދަކީ ކުއްލި ޙާލަތްތަކުގައި އިމަރޖެންސީ ޚިދުމަތް ފޯރުކޮށްދިނުމާއި، ފަތުރުވެރިކަމުގެ ޞިނާޢަތު ކުރިއެރުވުމެވެ. މި ޚިދުމަތް ދިނުމަށް ހޮވޭ ފަރާތަކަށް 10 އަހަރުގެ މުއްދަތަކަށް ރާއްޖޭގެ އެކި ސަރަޙައްދުތަކަށް ފަތުރުވެރިން އުފުލުމުގެ ހުއްދަ ދެވޭނެއެވެ.
މި ޚިދުމަތް ދިނުމަށް ޝައުޤުވެރިވާ ފަރާތްތަކަށް ކުރިމަތިލުމަށް ހުޅުވާލެވުނީ މި އަހަރުގެ އޮގަސްޓް މަހުގައެވެ.