މޯލްޑިވްސް އިމިގްރޭޝަންގެ 5 މުވައްޒަފަކު ޤާނޫނާއި ގަވާއިދާ ޚިލާފަށް ބިދޭސީންނާ ގުޅުންހުރި ކަންކަން ކޮށް، އެކި ފަރާތްތަކުން ނަހަމަގޮތުގައި ފައިސާ ހޯދަމުންދާކަމަށް ތުހުމަތުކުރެވޭ މައްސަލައެއް މޯލްޑިވްސް ޕޮލިސް ސަރވިސް މެދުވެރިކޮށް ތަޙުޤީޤުކުރަމުންދާކަމަށް ހޯމްލޭންޑް މިނިސްޓަރ އަލީ އިހްސާން ވިދާޅުވެއްޖެ އެވެ.
“އެކްސް”ގައި އިހްސާން ވަނީ މި މައްސަލައިގައި ތުހުމަތުކުރެވޭ ފަރާތްތަކުން ބޭނުންކުރާ އިލެކްޓްރޯނިކް ސާމާނު ހިފަހައްޓައި، އެ ފަރާތްތަކުގެ ދިރިއުޅޭ ތަންތަން ބަލައި ފާސްކޮށްފައިވާ ކަމަށެވެ. މި މައްސަލައިގެ އިތުރު ތަފްސީލުތައް ތަޙުޤީޤު ކުރިއަށްދާ ވަރަކުން ފުލުހުންނާއި ކަމާ ބެހޭ އެހެން އިދާރާތައް ގުޅިގެން ހާމަކުރަމުން ދާނެ ކަމަށްވެސް އިހްސާން ވިދާޅުވިއެވެ.
މި މައްސަލައާ ގުޅޭގޮތުން ވާހަކަދައްކަވަމުން އިހްސާން ވިދާޅުވީ، ޔުނިފޯމު އަޅައިގެން ތިބޭ މުއައްސަސާތަކުގެ މުވައްޒަފުން ޔުނިފޯމުގެ ހުރުމަތް ކަނޑައި، ރައްޔިތުންގެ ކުރިމަތީގައި މުއައްސަސާތަކުގެ އިތުބާރު ގެއްލުވާލަމުންދާ ފަރާތްތަކާ ދޭތެރޭ ޤާނޫނީގޮތުން އެޅޭ އެންމެ ހަރުކަށި ފިޔަވަޅު އެޅުމަކީ ރައީސުލްޖުމްހޫރިއްޔާ އަންގަވާފައިވާ ކަމެއް ކަމަށެވެ.
“މިފަދަ ކަންކަމަކީ މި ސަރުކާރުން އެއްވެސް ވަރަކަށް ތަޙައްމަލު ކުރާނެ ކަންކަމެއް ނޫން،” ކަމަށް ބުނެ، އިހްސާން ވަނީ ދައުލަތުގެ މުއައްސަސާތަކުގެ އިތުބާރު ގެއްލިދާނެފަދަ ކަންކަމުން ބަރީއަވެ ތިބުމަށް އެންމެހާ ފަރާތްތަކަށް ތަކުރާރުކޮށް ގޮވާލާފައެވެ.
އަދި މި މައްސަލައަކީ ދައުލަތުގެ މުއައްސަސާތަކުގެ އިތުބާރަށް އޮތް ބޮޑު ގޮންޖެހުމެއް ކަމަށާއި، މިފަދަ ޢަމަލުތައް ހުއްޓުވުމަށް ސަރުކާރުން ދަނީ މަސައްކަތްކުރަމުން ކަމަށް ވެސް އިހްސާން ފާހަގަކުރެއްވިއެވެ.