ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އިން މިއަދު މާލޭ މަގުތަކުގައި ހުރި ޑިސްޓްރިބިއުޝަން ފޮށިތައް ސާފުކުރުމުގެ މަސައްކަތް ފަށައިފިއެވެ.
ސްޓެލްކޯއިން ބުނިގޮތުގައި މި މަސައްކަތަކީ “ޗާލު ވެށި – މަގޭ ޒިންމާ” ގެ ނަމުގައި ކުރިއަށްގެންދާ ޙަރަކާތެއްގެ ބައެކެވެ.
މި ޙަރަކާތުގެ ދަށުން، ކުންފުނީގެ މުވައްޒަފުން ސަބް ސްޓޭޝަންތަކާއި މަގުމަތީގައި ހުރި ޑިސްޓްރިބިއުޝަން ފޮށިތަކުގައި ތަތްކޮށްފައިވާ އިޝްތިހާރުތަކާއި އެހެނިހެން ތަކެތި ނައްޓައި، އެ ތަންތަން ސާފުކުރަމުންދާ ކަމަށް ސްޓެލްކޯއިން ބުނެފައިވެއެވެ.
މި ޙަރަކާތް ފައްޓަވައިދެއްވީ މިނިސްޓަރ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނަރޖީ ޠާރިޤް އިބްރާހީޤް އިބްރާހީމާއި، މާލެ ސިޓީގެ މޭޔަރ އާދަމް ޢާޒިމް އަދި ސްޓެލްކޯގެ މެނޭޖިންގ ޑިރެކްޓަރ ޙުސައިން ފަހުމީއެވެ.
މި ހަރަކާތް ފައްޓަވައިދެއްވަމުން ފަހުމީ ވަނީ މި ޕްރޮގްރާމަކީ ދުވަސްކޮޅަކު ކުރުމަށްފަހު ހުއްޓާލުމަށް ކުރާ ކަމެއް ނޫން ކަމަށާއި، ދިގު މުއްދަތަކަށް ފައިދާކުރުވަނިވި ގޮތަކަށް އެކަން ކުރާނެކަމަށް ވިދާޅުވެފައެވެ.
ރާއްޖޭގައި ބާއްވާ އިންތިޚާބުތަކުގައި ކެމްޕޭނު ޕޯސްޓަރުތައް ސްޓެލްކޯގެ ފޮށިތަކާއި ސްޓޭޝަންތަކުގައި ހަރުކުރުމުގެ ސަބަބުން، މި ތަންތަން ވަނީ ވަރަށް ބޮޑަށް ހަޑިވެފައެވެ. މި ޙަރަކާތުގެ ސަބަބުން މާލޭގެ މަގުތަކުގެ ސާފުތާހިރުކަން އިތުރުވެ، ޑިސްޓްރިބިއުޝަން ފޮށިތަކާއި ސަބް ސްޓޭޝަންތަކުގެ ޙާލަތު ރަނގަޅުވާނެ ކަމަށް ފަހުމީ ވިދާޅުވިއެވެ.