ދިވެހިރާއްޖޭގެ ޒަކާތު ހައުސްއިން އިންތިޒާމްކޮށްގެން ކުރިއަށް ގެންދާ ބައިނަލްއަޤްވާމީ ޒަކާތު ކޮންފަރެންސްއިން ޤައުމަށް މުހިންމު ފައިދާތަކެއް ކުރާނެ ކަމަށް ދިވެހިރާއްޖޭގެ އިސްލާމީ ޔުނިވަރސިޓީގެ ވައިސް ޗާންސެލަރ ޑރ. ޢަލީ ޒާހިރު ބިން ސަޢީދު ޤާސިމް ވިދާޅުވެއްޖެއެވެ.
ކޮންފަރެންސްގެ ފެށުމުގެ ރަސްމިއްޔާތުގައި ވާހަކަފުޅު ދައްކަވަމުން ޑރ. ޢަލީ ޒާހިރު ވިދާޅުވީ، މިފަދަ ދަނޑިވަޅެއްގައި ޒަކާތާ ގުޅޭ ކޮންފަރެންސެއް ބޭއްވުމަކީ ވަރަށް ބޭނުންތެރި އަދި މުހިންމު ކަމެއް ކަމަށެވެ. އަދި ބޭރުގެ ފަރާތްތަކުން ވެސް ބައިވެރިވެ ކުރިއަށްދާ މި މަހާސިންތާއިން ގިނަ ފައިދާތަކެއް ކުރާނެ ކަމަށް އެމަނިކުފާނު ފާހަގަކުރެއްވިއެވެ.
މީގެއިތުރުން ޒަކާތުގެ ކަންކަން ތަރައްޤީވެފައި ހުރި ޤައުމުތަކުން ވަޑައިގެންނެވި ބޭފުޅުން ތަޖުރިބާ ހިއްސާކުރެއްވުމަކީ ރާއްޖޭގެ ޒަކާތުގެ ނިޒާމު ހަރުދަނާކުރުމަށް ލިބޭނެ އިތުރު ކުރިއެރުމެއްކަން ޑރ. ޢަލީ ޒާހިރު ފާހަގަކުރެއްވިއެވެ.
އެމަނިކުފާނު އިތުރަށް ވިދާޅުވީ، ޒަކާތުގެ ކަންކަން ހަރުދަނާކޮށް ޒަކާތު ފަންޑު ރަނގަޅަށް މެނޭޖުކުރެވުމަކީ ދުވަހުން ދުވަހަށް ފަޤީރުންގެ ލިސްޓުގައި ތިބޭ ފަގީރުންގެ އަދަދު މަދުވެގެންދާނެ ކަމެއް ކަމަށެވެ. އަދި މިހާރު ވެސް ޒަކާތަށް ވަރަށް ބޮޑަށް ހޭލުންތެރިކަން އިތުރުކުރެވިފައިވާ ނަމަވެސް، މި މަސައްކަތް އިތުރަށް ފުޅާކުރަން ޖެހޭކަމަށް އެމަނިކުފާނު ފާހަގަކުރެއްވިއެވެ.
ޑރ. ޢަލީ ޒާހިރުގެ ވާހަކަފުޅުގައި އަދުގެ ސަރުކާރުން ޒަކާތުގެ ކަންކަމަށް ދެއްވާ ޚާއްޞަ ސަމާލުކަން ފާހަގަކުރައްވައި، ޒަކާތު ހައުސް އުފެއްދެވި މަތިވެރި މަޤުޞަދަށް ވެސް އަލިއަޅުވާލެއްވިއެވެ. އަދި މި ކޮންފަރެންސްގެ ތެރެއިން ޒަކާތުގެ ކަންކަން ހަރުދަނާކުރުމަށް ޓަކައި ތަފާތު މޮޅު ޚިޔާލުތައް ލިބޭނެކަމަށް ޔަޤީންކުރައްވާ ކަމަށް ވެސް އެމަނިކުފާނު ވިދާޅުވިއެވެ.
ބުރާސްފަތި ދުވަހު ފެށި ބައިނަލްއަގުވާމީ ޒަކާތު ކޮންފަރެންސްގެ މަގުސަދުތަކުގެ ތެރޭގައި ރާއްޖޭގައި ގާއިމުކުރެވިފައިވާ ޒަކާތުގެ ނިޒާމު ކުރިއެރުވުން ހިމެނޭއިރު، ކޮންފަރެންސްގައި އިލްމުވެރިންނާއި އެ މަސައްކަތުގައި އުޅޭ މީހުންނާއި ސިޔާސަތުތައް ކަނޑައަޅާ ފަރާތްތަކާ އަދި މުޖުތަމައުގެ އިސްވެރިން ބައިވެރިވެފައިވެއެވެ.