ރާއްޖޭގެ ހުރިހާ ނިޒާމުތަކެއް އަދިވެސް ލާމަރުކަޒީ ނިޒާމަށް ފުރިހަމައަށް ތައްޔާރުވެފައި ނުވާ ކަމަށް ލޯކަލް ގަވަރމަންޓް އެންޑް ޕަބްލިކް ވަރކްސް މިނިސްޓަރ އާދަމް ޝަރީފް އުމަރު ވިދާޅުވެއްޖެއެވެ.
މިނިސްޓަރ މިހެން ވިދާޅުވީ މަތިވެރި ކައުންސިލުން އިންތިޒާމުކޮށްގެން ހިންގި މާލީ ބަޔާން ތައްޔާރުކުރުމުގެ ތަމްރީނު ޕްރޮގްރާމްގެ ނިންމުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ.
އިއްޔެ ހަވީރު މަތިވެރީގައި ބޭއްވުނު މި ރަސްމިއްޔާތުގައި އޮޑިޓަރ ޖެނެރަލް، އަރިއަތޮޅު އުތުރުބުރީ އަތޮޅު ކައުންސިލްގެ ރައީސް އަދި މަތިވެރި ކައުންސިލްގެ ރައީސް ފަދަ އިސް ބޭފުޅުން ބައިވެރިވެވަޑައިގެންނެވިއެވެ.
މި ރަސްމިއްޔާތުގައި ވާހަކަފުޅުދައްކަވަމުން މިނިސްޓަރ އާދަމް ޝަރީފް މިފަދަ ތަމްރީނާއި ޕްރޮފެޝަނަލް ޑިވެލޮޕްމަންޓް ޕްރޮގްރާމްތަކުގެ މުހިންމުކަން ފާހަގަކުރައްވައި، މިފަދަ ޕްރޮގްރާމްތަކުން މުއައްސަސާތަކަށް ބޮޑެތި ފައިދާތަކެއް ކުރާނެ ކަމަށް ވިދާޅުވިއެވެ. އަދި ކުރިއަށް އޮތްތަނުގައި ޤައުމުގެ އެކި ސަރަޙައްދުތަކުގައި މިފަދަ ޕްރޮގްރާމްތައް ހިންގުމަށް އިސްކަންދޭނެ ކަމަށްވެސް އެމަނިކުފާނު ވިދާޅުވިއެވެ.
މިނިސްޓަރުގެ ވާހަކަފުޅުގައި، ކުރީގައި މުއައްސަސާއެއް އޮޑިޓްކުރާ ވާހަކަ އިވުމުން މުވައްޒަފުންގެ މެދުގައި ކަންބޮޑުވުން އުފެދޭކަން ފާހަގަކުރެއްވިއެވެ. ނަމަވެސް، އޮޑިޓްތަކާއި އޮޑިޓް ރިޕޯޓުތަކުގެ މަޤްޞަދަކީ މުއައްސަސާގެ މައްސަލަތައް ދެނެގަނެ، އެ މައްސަލަތައް ހައްލުކުރާނެ ގޮތްތައް ހޯދައިދިނުން ކަމަށް އެމަނިކުފާނު ސާފުކޮށްދެއްވިއެވެ.
މީގެއިތުރުން، މަޢުލޫމާތާއެކު މަސައްކަތްކުރުމާއި މަޢުލޫމާތު ނެތި މަސައްކަތްކުރުމުގެ ތަފާތު ފާހަގަކުރައްވައި، މަޢުލޫމާތާއެކު ކުރެވޭ މަސައްކަތްތައް އިތުރަށް ހަރުދަނާވެ، ކުރިއެރުން އަވަސްވާނެ ކަމަށް މިނިސްޓަރ ވިދާޅުވިއެވެ. އަދި އޮޑިޓަރ ޖެނެރަލްގެ އޮފީހުން ދައުލަތުގެ މާލިއްޔަތާއި މުދާ ބެލެހެއްޓުމުގައި ދައްކަމުންދާ ފަރުވާތެރިކަން ތަޢުރީފުކުރައްވައި، އެ އޮފީހުން މަސައްކަތްކުރަނީ އެއީ ރައްޔިތުންގެ އަގުހުރި މުދާކަން ދެނެގަނެގެން ކަމަށްވެސް އެމަނިކުފާނު ވިދާޅުވިއެވެ.
މާލީ ބަޔާން ތައްޔާރުކުރުމުގެ މި ތަމްރީނު ޕްރޮގްރާމަކީ މަތިވެރި ކައުންސިލާއި އޮޑިޓަރ ޖެނެރަލްގެ އޮފީހުން ގުޅިގެން ހިންގި ޕްރޮގްރާމެކެވެ. މި ޕްރޮގްރާމުން ލޯކަލް ސަރުކާރުގެ ފެންވަރުގައި މާލީ މެނޭޖްމަންޓާއި ހާމަކަން އިތުރުކުރުމަށް މުހިންމު ހުނަރުތަކެއް ރަށު އޮފިޝަލުންނަށް ފޯރުކޮށްދީފައިވެއެވެ.