ބޮޕާލްގައި ހިންގި ބޮޑު މަކަރާއި ހީލަތުގެ މައްސަލައެއްގައި، 7 މަސްދުވަހުގެ ތެރޭގައި 25 ފިރިހެނުންނާ ކައިވެނިކޮށްގެން އޮޅުވާލި 23 އަހަރުގެ އަންހެނަކު ރާޖަސްތާން ފުލުހުން ވަނީ ހައްޔަރުކޮށްފައެވެ. އަނުރާދާ ޕަސްވާން ކަމަށް ކިޔާ މި އަންހެން މީހާ ހައްޔަރުކުރެވުނީ ސަވާއި މަދުޕޫރު ފުލުހުންގެ ފަރާތުންނެވެ. އޭނާގެ މި ޢަމަލުތަކާ ގުޅިގެން އޭނާއަށް ވަނީ “ލޫޓް-އެންޑް-ސްކޫޓް ބްރައިޑް” ގެ ނަމުން މަޝްހޫރުވެފައެވެ.
ފުލުހުން ބުނާ ގޮތުގައި އަނުރާދާއަކީ ރޭވިގެން ހިންގާ ކައިވެނީގެ މަކަރާއި ހީލަތުގެ ވިއުގައެއްގެ ބައިވެރިއެކެވެ. އޭނާ ޢަމަލުކުރާ ގޮތަކީ، ކައިވެންޏަށް އެދޭ އަންހެނެއްގެ ގޮތުގައި ހެދުމަށްފަހު، ޤާނޫނީ ގޮތުން ކައިވެނިކޮށް، ދެން މަދު ދުވަސްކޮޅެއްގެ ތެރޭގައި ރަން، ފައިސާ އަދި އިލެކްޓްރޯނިކް ތަކެތި ވަގަށް ނަގައިގެން ފިލައިދެއެވެ. މި މައްސަލަ ހާމަވީ މޭ 3 ވަނަ ދުވަހު ސަވާއި މަދުޕޫރުގެ ވިޝްނު ޝަރްމާ ހުށަހެޅި ޝަކުވާއަކާ ގުޅިގެންނެވެ. އޭނާ ވަނީ އަތްބެއް ހޯދުމަށް ސުނީތާ އަދި ޕައްޕު މީނާ ކިޔާ އޭޖެންޓުންނަށް 2 ލައްކަ ރުފިޔާ ދީފައެވެ. އަނުރާދާ އޭނާއާ ކައިވެނިކުރީ އޭޕްރިލް 20 ވަނަ ދުވަހު ލޯކަލް ކޯޓެއްގައެވެ. ނަމަވެސް މޭ 2 ވަނަ ދުވަހު އޭނާގެ އަގުބޮޑު ތަކެއްޗާއެކު ފިލައިގެން ގޮސްފައިވެއެވެ.
ތަޙުޤީޤު އޮފިސަރު މީތާ ލާލް ބުނާ ގޮތުގައި އަނުރާދާ ވަނީ އޭނާގެ މަކަރުވެރި ގޮތްތައް ވަރަށް ފުރިހަމައަށް ތަރައްޤީކޮށްފައެވެ. އޭނާގެ މާޒީގައި އުއްތަރު ޕްރަދޭޝްގެ މަހަރާޖްގަންޖްގެ ހޮސްޕިޓަލެއްގައި މަސައްކަތްކޮށްފައިވެއެވެ. އަދި ގޭތެރޭގެ މައްސަލައަކާ ގުޅިގެން ކުރީގެ ފިރިމީހާއާ ވަރިވެފައިވެއެވެ. ބޮޕާލްއަށް ބަދަލުވުމަށްފަހު، އޭނާ ބައިވެރިވެފައިވަނީ ކައިވެނީގެ މަކަރާއި ހީލަތުގައި ޚާއްޞަވެފައިވާ ކުށުގެ ވިއުގައަކާއެވެ. މި ވިއުގައިން ޢަމަލުކުރަނީ އޭޖެންޓުން މެދުވެރިކޮށް ވަޓްސްއެޕް ފަދަ ޕްލެޓްފޯމްތައް ބޭނުންކޮށްގެން ކައިވެންޏަށް އެދޭ އަންހެނުން ތަޢާރަފުކޮށްދީ، 2 ލައްކައިން 5 ލައްކަ ރުފިޔާއާ ދެމެދުގެ އަދަދުތަކުން ފީ ނެގުމަށްފަހުގައެވެ.
ޝަރްމާގެ ގެއިން ފިލުމަށްފަހު، އަނުރާދާ ވަނީ ބޮޕާލްގައި ގައްބަރު ނަމަކަށް ކިޔާ އެހެން ފިރިހެނަކާވެސް ކައިވެނިކޮށް، އޭނާގެ އަތުންވެސް 2 ލައްކަ ރުފިޔާ އޮޅުވާލައިގެން ނަގާފައެވެ. އޭނާ ހައްޔަރުކުރެވުނީ ފުލުހުން ސިއްރު އޮފިސަރަކު ކައިވެންޏަށް އެދޭ ފިރިހެނެއްގެ ގޮތުގައި ތަޢާރަފުކުރުމުން، އޭޖެންޓުން އޭނާގެ ފޮޓޯ ހިއްސާކުރުމާ ގުޅިގެންނެވެ.
މި މައްސަލައިގައި ބޮޕާލްގެ އެކި ސަރަޙައްދުތަކުގައި ދިރިއުޅޭ ރޮޝްނީ، ރަގުބީރު، ގޯލު، މަޖްބޫޓް ސިންގް ޔާދަވް އަދި އަރްޖަން ހިމެނޭ ގޮތަށް އިތުރު ގިނަ ބައެއް މި ވިއުގައިގައި ބައިވެރިވެފައިވާކަން ފުލުހުން ވަނީ ފާހަގަކޮށްފައެވެ.