ޔުގެންޑާއިގެ ބިމުގެ އަޑިން 12 ޓްރިލިއަން ޑޮލަރުގެ އަގުހުރި ރަނުގެ މަޢުދަން ހޯދައިފިއެވެ. މިއީ މިހާތަނަށް އިންސާނީ ތާރީޚުގައި ހޯދިފައިވާ ރަނުގެ މިންވަރަށްވުރެ ގިނަ އަދަދެކެވެ.
ޔުގެންޑާގެ ސަރުކާރުން ބުނާ ގޮތުގައި އެ ގައުމުން ހޯދިފައިވަނީ 31 މިލިއަން މެޓްރިކް ޓަނުގެ ރަނުގެ މަޢުދަނެވެ. މި ހޯދުމާއެކު، ދުނިޔޭގެ އެންމެ ފަގީރު ގައުމުތަކުގެ ތެރޭގައި ހިމެނޭ ޔުގެންޑާއަށް އިގްތިސާދީ ގޮތުން ބޮޑު ކުރިއެރުމެއް ލިބިގެންދާނެ ކަމަށް ލަފާކުރެވެއެވެ.
މި ޙަޒާނާއަށް މިހާރުވެސް ވަނީ ގިނަ ކުންފުނިތަކަކުން އެތައް ސަތޭކަ މިލިއަން ޑޮލަރުގެ އިންވެސްޓްމަންޓްތައް ކުރަން ފަށާފައެވެ. އަދި މީގެ ސަބަބުން ޔުގެންޑާގެ އިގްތިސާދު އަހަރަކު 15 އިންސައްތައިން ކުރިއަރާނެ ކަމަށް ލަފާކުރެވެއެވެ.
ނަމަވެސް، މައުދަން ހޯދުމުގެ ދާއިރާގެ މާހިރުން މި އަދަދުތަކާމެދު ސުވާލު އުފައްދާފައިވެއެވެ. “މިއީ މިހާތަނަށް ފެނިފައިނުވާ ބޮޑު އަދަދެއް. އެހެންކަމުން މި ހޯދުން އިތުރަށް ކަށަވަރުކުރަން ޖެހޭ،” މައުދަން ހޯދުމުގެ ދާއިރާގެ މާހިރުން ބުނެފައިވެއެވެ.
މި ހޯދުމަކީ ޔުގެންޑާއަށް ލިބުނު ގުދުރަތީ މުއްސަނދިކަމުގެ އެންމެ ބޮޑު ހޯދުންކަމުގައި ވިޔަސް، ނުވަތަ މިއީ މައުދަން ހޯދުމުގެ ތާރީޚުގައި ކުރެވުނު އެންމެ ބޮޑު އޮޅުމެއް ކަމުގައި ވިޔަސް، މިކަން ވަނޯ މުޅި ދުނިޔޭގެ ސަމާލުކަމަށް އައިސްފައެވެ.