ކުރިއަށް އޮތް ލޯކަލް ކައުންސިލްތަކުގެ އިންތިހާބަށް ތައްޔާރުވުމުގެ ގޮތުން، ވެރިކަން ކުރާ ކޮންގްރެސް ޕާޓީ (ޕީއެންސީ) އިން މާލޭގައި ކުރިއަށްގެންދާ ކެމްޕެއިން ހަރަކާތްތަކުގެ ތެރެއިން މައްޗަންގޯޅި ދެކުނު ދާއިރާގެ ގޭގެއަށް ޒިޔާރަތްކުރުމުގެ ހަރަކާތެއް ބާއްވައިފިއެވެ. މި ހަރަކާތަކީ އެ ދާއިރާގެ ރައްޔިތުންނާ ބައްދަލުކޮށް، ޕާޓީގެ ކެނޑިޑޭޓުން ތައާރަފުކުރުމަށް ކުރިއަށްގެންދިޔަ ހަރަކާތެކެވެ.
އިއްޔެ ކުރިއަށްދިޔަ މި ހަރަކާތުގައި މާލެ ސިޓީގެ މޭޔަރުކަމަށް ޕީއެންސީގެ ޓިކެޓުގައި ވާދަކުރައްވާ މޫސާ އަލީ ޖަލީލު އާއި، މާލެ ސިޓީގެ އަންހެނުންގެ ތަރައްގީއަށް މަސައްކަތްކުރާ ކޮމިޓީގެ ރައީސާގެ މަގާމަށް ވާދަކުރައްވާ އަލްއުސްތާޛާ ޢާއިޝަތު އަލައިކާ ޢަދުނާނު ބައިވެރިވެވަޑައިގެންނެވިއެވެ. މީގެ އިތުރުން މައްޗަންގޯޅި ދެކުނު ދާއިރާގެ މަޖިލިސް މެންބަރު މުސްތަފާ ހުސައިންނާއި، އެ ދާއިރާގެ ކައުންސިލް ގޮނޑިއަށް ވާދަކުރައްވާ ކެނޑިޑޭޓުންވެސް މި ހަރަކާތުގައި އަމަލީގޮތުން ބައިވެރިވެވަޑައިގެންނެވިއެވެ.
ކޮންގްރެސް ޕާޓީން މާލޭގެ އިތުރުން އަތޮޅުތެރޭގެ ރަށްރަށުގައިވެސް އަންނަނީ ވަރަށް ފޯރިއާއެކު ކެމްޕެއިން ހަރަކާތްތައް ހިންގަމުންނެވެ. އެގޮތުން ޕާޓީގެ އިސް ބައެއް ލީޑަރުން ރަށްރަށަށް ވަޑައިގެން، ރައްޔިތުންނާ ބައްދަލުކޮށް ކެމްޕެއިންގެ މަސައްކަތްތައް އަންނަނީ ވިލަރެސްކުރައްވަމުންނެވެ. މި ހަރަކާތްތަކުގެ މައިގަނޑު ބޭނުމަކީ ސަރުކާރުގެ ސިޔާސަތުތައް ރައްޔިތުންނަށް އޮޅުންފިލުވައިދީ، އިންތިހާބަށް ތާއީދު ހޯދުމެވެ.
ސަރުކާރުން ފަށާފައިވާ ތަރައްގީގެ މަޝްރޫއުތައް ހަލުއިކަމާއެކު ކުރިއަށްގެންގޮސް، ރައްޔިތުންނަށް ވެފައިވާ ވައުދުތައް ފުއްދުމުގައި ސަރުކާރަށް ފުރިހަމަ އެއްބާރުލުންދޭނެ ކައުންސިލަރުން އިންތިހާބުކޮށްދިނުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ މީގެ ކުރިން ރައްޔިތުންގެ ކިބައިން އެދިވަޑައިގެންފައެވެ. އެހެންކަމުން، ޕީއެންސީގެ ކެމްޕެއިން ހަރަކާތްތައް ބިނާވެފައިވަނީ ސަރުކާރުގެ ތަރައްގީގެ ތަސައްވުރު ހަގީގަތަކަށް ހެދުމަށް މަސައްކަތްކުރާނެ މެންބަރުން ހޮވުމުގެ މައްޗަށެވެ.