ދިރާސީ އާ އަހަރުގެ ކިޔެވުން މިއަދު ފަށައިފިއެވެ.
ޖުމްލަ 77000 އަށްވުރެ ގިނަ ދަރިވަރުންނާއެކު މިއަދު ސްކޫލުތަކުގެ ކިޔެވުން ފެށިފައި ވަނީ ގާތްގަނޑަކަށް ދޮޅުމަހަށް ވުރެ ގިނަ ދުވަހުގެ ބަންދަކަށްފަހުގައެވެ.
މިއަދު ކިޔަވައިދޭން ފަށާފައިވަނީ ޖުމްލަ 9،952 ޓީޗަރުންނާއި އެކުގައެވެ. އޭގެ ތެރެއިން 8،000 އަށް ވުރެ ގިނަ ޓީޗަރުންނަކީ ދިވެހި ޓީޗަރުންނެވެ.
218 ސްކޫލެއްގައި މިއަދު ކިޔެވުން ފެށިއިރު، މާލެ ސަރަހައްދުގައި ވަނީ އާ އެއް ސްކޫލެއްގައި ކިޔެވުން ފަށައިފައެވެ. އެއީ ހުޅުމާލޭ ދެވަނަ ފިޔަވަހީގައި އަލަށް އިމާރާތް ކުރި ޝަހީ އަލީ ސްކޫލެވެ. އެ ސްކޫލްގައި ކިޔަވައިދިނުމަށް ހަމަޖެހިފައިވާ ދެ ދަންފަޅިއަށެވެ.
އެޑިޔުކޭޝަން މިނިސްޓްރީން ބުނެފައިވާ ގޮތުގައި މިއަހަރު އަތޮޅުތަކުން މާލޭގެ ސްކޫލްތަކަށް 1،530 ދަރިވަރަކު ބަދަލުވުމަށް އެދިފައިވެ އެވެ. އަދި މާލެ އިން ހުޅުމާލޭގެ ސްކޫލްތަކަށް 836 ދަރިވަރުން ބަދަލުވެފައިވެ އެވެ.
އެކަޑަމިކް ކަލަންޑަރުގައިވާ ގޮތުން، މިއަދު ފެށުނު ދިރާސީ އަހަރުގެ ފުރަތަމަ ޓާމުގެ މިޑް ބްރޭކް ދަރިވަރުންނަށް ލިބޭނީ މެއި މަހުގެ 24 ވަނަ ދުވަހުން 30 ވަނަ ދުވަހުގެ ނިޔަލަށެވެ. އަދި ފުރަތަމަ ޓާމުގެ ކިޔެވުން ނިންމައި ދަރިވަރުން ޗުއްޓީއަށް ދާނީ ޖުލައި މަހުގެ 17 ވަނަ ދުވަހުން އޮގަސްޓް މަހުގެ އެއްވަނަ ދުވަހުގެ ނިޔަލަށެވެ.