އިންޑިއާގެ ބައެއް ސަރަހައްދުތަކުން ނިޕާ ވައިރަސް ފެނުމާ ގުޅިގެން، ރާއްޖެއަށް އެ ބަލީގެ ނުރައްކާ އޮތް މިންވަރު މިވަގުތު ކުޑަ ކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ހާމަކޮށްފިއެވެ. އެޗްޕީއޭއިން ބުނީ އިންޑިއާގެ ވެސްޓް ބެންގާލްއިން އެ ބައްޔަށް ޕޮޒިޓިވްވި މީހުންނާ ކޮންޓެކްޓުވި 180 އަށް ވުރެ ގިނަ މީހުން ދެނެގަނެވި، އެމީހުން މިހާރު ކަރަންޓީނު ކުރެވިފައިވާ ކަމަށެވެ.
އެޗްޕީއޭއިން އިތުރަށް ބުނި ގޮތުގައި، ކަރަންޓީނު ކުރެވުނު މީހުންގެ ހާލަތު އެ ގައުމުގެ ކަމާބެހޭ ފަރާތްތަކުން ވަރަށް ގާތުން ބަލަމުން އަންނަ ކަމަށާއި، މިއަދާ ހަމައަށް ބަލި ޖެހިގެން އިތުރު ކޭސްއެއް ފެނިފައެއް ނުވެއެވެ. އަދި މި ކޭސްތަކާ ގުޅިގެން އިންޑިއާގެ އެހެން ސަރަހައްދަކުން ނުވަތަ އެހެން ގައުމަކުން ވެސް މި ބަލި ފެނިފައިވާ ކަމުގެ ރިޕޯޓެއް ލިބިފައި ނުވާ ކަމަށް އެ އިދާރާއިން ފާހަގަކުރެއެވެ.
ރާއްޖެއަށް މި ބަލީގެ ނުރައްކާ ކުޑަ ނަމަވެސް، އެޗްޕީއޭއިން ދަނީ ބައިނަލްއަގުވާމީ ހާލަތު މޮނިޓާ ކުރަމުންނެވެ. މިހާތަނަށް ރާއްޖެއިން މި ބަލީގެ އެއްވެސް ކޭސްއެއް ނުވަތަ ބައްޔަށް ޝައްކު ކުރެވޭ ފަރާތެއް ވެސް ރިޕޯޓުކޮށްފައި ނުވާ ކަމަށް އެ އޭޖެންސީން ބުނެއެވެ. ނަމަވެސް، ބަލި ފެނިފައިވާ ވެސްޓް ބެންގާލް ސަރަހައްދަށް ދަތުރުކުރާ ދިވެހިން މިކަމަށް ސަމާލުވުމަށް އެޗްޕީއޭއިން ވަނީ އިލްތިމާސްކޮށްފައެވެ.
އާންމު ސިއްހަތު ރައްކާތެރިކުރުމުގެ ގޮތުން އަޅަންޖެހޭ ފިޔަވަޅުތައް އެޅުމަށްޓަކައި، ކަމާ ގުޅުންހުރި އިދާރާތަކާއި ސިއްހީ ހިދުމަތްދޭ ތަންތަނާ ގުޅިގެން މަސައްކަތް ކުރަމުންދާ ކަމަށް އެޗްޕީއޭއިން ބުނެއެވެ. މި ބައްޔަކީ ޖަނަވާރުންގެ ފަރާތުން އިންސާނުންނަށް ޖެހޭ ބައްޔަކަށް ވާއިރު، ރައްކާތެރިކަމުގެ ފިޔަވަޅުތަކަށް ސަމާލުވުމަކީ މުހިންމު ކަމެއް ކަމަށް އެ އިދާރާއިން ފާހަގަކުރެއެވެ.