ވެށިފަހި މާލެ މަޝްރޫޢާއި ހިޔާ މަޝްރޫޢުގެ ދަށުން ފްލެޓް ލިބޭނެ ކަމުގެ ލިޔުން ލިބި، ނަމަވެސް މިހާތަނަށް ފްލެޓް ހަވާލުނުކުރާ ފަރާތްތަކަށް ހާއްސަ ކެޓަގަރީއަށް ކުރިމަތިލާއިރު، އަސްލު ލިޔުން ނެތް ނަމަވެސް އެކަން ސާބިތުކޮށްދޭ އެހެން ރަސްމީ ލިޔުމެއް ހުށަހެޅިދާނެ ކަމަށް އިމާރާތްކުރުމާއި ގެދޮރުވެރިކަމާ ބިނާރާ ބެހޭ ވުޒާރާއިން ވިދާޅުވެއްޖެއެވެ. އެ ވުޒާރާއިން ހާމަކުރެއްވި ގޮތުގައި، ކަމާގުޅޭ އިދާރާއަކުން އާންމުކޮށްފައިވާ ރަސްމީ ލިސްޓެއްގައި ނަން އޮތްކަން އެނގޭނެ ފަދަ ލިޔުމެއް ނުވަތަ އެފަރާތަކަށް ފްލެޓް ލިބޭނެކަން ކަށަވަރުވާ އެހެން ލިޔުމެއް ހުށަހެޅުމުން ވެސް ބަލައިގަންނާނެއެވެ.
މި ނިންމުމަކީ ސަރުކާރުގެ “ބޯހިޔާވަހިކަން އެންމެންނަށް” ސިޔާސަތުގެ ދަށުން، ކުރީގެ މަޝްރޫޢުތަކުން ފްލެޓް ކަށަވަރުވެފައިވާ ނަމަވެސް އެކި ސަބަބުތަކާ ހުރެ ފްލެޓް ނުލިބި ތިބި ފަރާތްތަކަށް ލުއި ފަސޭހަކޮށްދިނުމަށް ނިންމި ނިންމުމެކެވެ. މީގެ ތެރޭގައި 2010 ވަނަ އަހަރުގެ ވެށިފަހި މާލެ މަޝްރޫޢާއި 2017 ވަނަ އަހަރުގެ ހިޔާ މަޝްރޫޢުން ފްލެޓް ލިބޭނެ ކަމަށް ކަނޑައެޅި، ނަމަވެސް ލިޔެކިޔުން ގެއްލިފައިވާ ނުވަތަ އެއްބަސްވުމުގެ ރަޖިސްޓްރީ ނެތް ފަރާތްތައް ހިމެނެއެވެ. މި ހާއްސަ ކެޓަގަރީއަށް ޖުމްލަ 500 ފްލެޓް ދޫކުރުމަށް ސަރުކާރުން ވަނީ ކަނޑައަޅާފައެވެ.
ވެށިފަހި މާލެ ސްކީމުން ބޯހިޔާވަހިކަން ލިބޭނެ ކަމަށް ކަނޑައެޅި 160 އަށްވުރެ ގިނަ މީހުންނަށް ފްލެޓް ނުލިބޭ ކަމުގެ ޝަކުވާ 2020 ވަނަ އަހަރުވެސް ހުށަހަޅާފައިވާއިރު، ހިޔާ މަޝްރޫޢުގެ އެކި ކެޓަގަރީތަކުގެ ލިސްޓުގައި ހިމެނުނު ގިނަ ބަޔަކަށް ވެސް މިހާތަނަށް ފްލެޓް ލިބިފައެއް ނުވެއެވެ. ގެދޮރުވެރިކަމާ ބެހޭ ވުޒާރާއިން ވިދާޅުވީ، ރަސްމީ ލިސްޓުގައި ނަން އޮތްކަން ސާބިތުކޮށްދެވޭ ނަމަ، އެ ކެޓަގަރީއަށް ކަނޑައަޅާފައިވާ ޝަރުތުތަކާ އެއްގޮތަށް އެ ފަރާތްތަކަށް ކުރިމަތިލުމުގެ ފުރުސަތު އޮންނާނެ ކަމަށެވެ.
ސަރުކާރުގެ އައު ބޯހިޔާވަހިކަމުގެ މަޝްރޫޢުގެ ދަށުން ފްލެޓަށް ކުރިމަތިލުމުގެ ފުރުސަތު މިހާރު ވަނީ ހުޅުވާލާފައެވެ. މި މަޝްރޫޢުގެ ދަށުން ފްލެޓަށް އެދި ހުށަހެޅުމުގެ އެންމެ ފަހު ތާރީޚަކީ މިއަހަރުގެ އޭޕްރިލް މަހުގެ 14 ވަނަ ދުވަހެވެ. ވުޒާރާއިން އިލްތިމާސް ކުރައްވަނީ ލިޔެކިޔުންތައް ހަމަކޮށް، ކަނޑައެޅިފައިވާ މުއްދަތުގެ ތެރޭގައި ފޯމު ހުށަހެޅުމަށެވެ.