އެމެރިކާ އާއި އިޒްރޭލުން އިސްވެ އިރާނަށް ދިން ހަމަލާތަކާ ގުޅިގެން މެދުއިރުމަތީގައި އުފެދިފައިވާ ހަނގުރާމައިގެ ސަބަބުން، ރާއްޖެއަށް ބުދަ ދުވަހު އަންނަން ތާވަލުކޮށްފައި އޮތް 18 ފްލައިޓެއް ކެންސަލްވެފައިވާ ކަމަށް މިނިސްޓަރ އޮފް ޓްރާންސްޕޯޓް އެންޑް ސިވިލް އޭވިއޭޝަން މުހައްމަދު އަމީން ވިދާޅުވެއްޖެއެވެ. ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި މިނިސްޓަރު ވިދާޅުވީ، ރާއްޖެއަށް ގިނަ އަދަދެއްގެ ފަތުރުވެރިން ޒިޔާރަތްކުރާ މެދުއިރުމަތީގެ މަގުތައް ބަންދުވުމަކީ ރާއްޖޭގެ ފަތުރުވެރިކަމަށް ބޮޑެތި އަސަރުތަކެއް ކުރާނެ ކަމެއް ކަމަށެވެ.
މިނިސްޓަރު އަމީން ހާމަކުރެއްވި ގޮތުގައި، ބުދަ ދުވަހު ރާއްޖެއަށް ޖުމްލަ 53 ޝެޑިއުލް ފްލައިޓް އަންނަން އޮތް ނަމަވެސް، އޭގެ ތެރެއިން 18 ފްލައިޓެއް ވަނީ ކެންސަލްކޮށްފައެވެ. މީގެ ތެރޭގައި ހިމެނެނީ ދުބާއީ، އަބޫދާބީ، ދޯހާ، ޝާރްޖާ އަދި ބަހްރޭނުގެ އެއާލައިންތަކުން ރާއްޖެއަށް ކުރަން ހަމަޖެހިފައިވާ ދަތުރުތަކެވެ. މިދިޔަ މަހުގެ 28 ވަނަ ދުވަހުން ފެށިގެން މިފަދަ ގޮތަކަށް ދަތުރުތަކަށް ބުރޫއަރަމުންދާކަން މިނިސްޓަރު ފާހަގަކުރެއްވިއެވެ.
މި ހާލަތާ ގުޅޭގޮތުން ވާހަކަދައްކަވަމުން މިނިސްޓަރު ވިދާޅުވީ، މި އަދަދަކީ އިންޑަސްޓްރީއަށް ދެރަތަކެއް ދިމާވާނެ އަދަދެއްކަމަށެވެ. މި ބަދަލުތަކުގެ ސަބަބުން ފަތުރުވެރިކަމުގެ ސިނާއަތަށް ކުރިމަތިވާ ގޮންޖެހުންތަކަށް ސަރުކާރުން ސަމާލުކަން ދެމުންދާކަމަށްވެސް އޭނާ ވިދާޅުވިއެވެ.
ދަތުރުތައް މެދުކަނޑާލުމުގެ ސަބަބުން ރާއްޖެއިން ބޭރަށް ނުފުރި 370 އަށްވުރެ ގިނަ ފަތުރުވެރިން މިވަގުތު ތާށިވެފައި އެބަތިއްބެވެ. މީގެ ތެރެއިން 110 އެއްހާ ފަތުރުވެރިން ވެލާނާ އިންޓަނޭޝަނަލް އެއާޕޯޓުގައި ތިބިއިރު، އެ ފަރާތްތަކަށް ބޭނުންވާ ހުރުމާއި އެހެނިހެން އިންތިޒާމުތައް ސަރުކާރުގެ ފަރާތުން ހަމަޖައްސައިދެމުންދާ ކަމަށް މިނިސްޓަރު އަމީން އިތުރަށް މައުލޫމާތު ދެއްވިއެވެ.