ތޫނު އެއްޗެއް ހިފައިގެން ހުރި ފިރިހެނަކު ފިންލޭންޑް ސްކޫލްއަށް ވަދެ ދަރިވަރުންނަށް ބިރު ދެއްކި މައްސަލައެއް ފެންމަތިވެއްޖެއެވެ.
ފުލުހުން ބުނީ މާލޭ ސްކޫލެއް ކައިރީ މީހަކު އާއްމު އުދަނގޫ ކުރާ ކަމަށް މިއަދު 11:25 އެހާކަންހާއިރު ފުލުހުންނަށް ރިޕޯޓްކޮށްފައިވާ ކަމަށެވެ.
މި ނޫހަށް މައުލޫމާތުދެމުން ފިންލޭންޑް ސްކޫލްގެ ދަރިވަރެއްގެ ބެލެނިވެރިއަކު ބުނީ ގޭޓް ކައިރީ ހުރެ ކުދިން އަށް ގޮވާ އެމީހާ ހަޅޭއްވެސް ލެވި ކަމަށެވެ.
އަދި އޭގެ ފަހުން ސްކޫލް ބޭރުގައި ހުރި ގަހަކަށް އަރައި އެ ފިރިހެންމީހާ ސްކޫލަށް ފުންމާލީ ކަމަށާއި އޭގެ ފަހުން އޭނާ ޖީބުން ވަޅިއެއްވެސް ނެގި ކަމަށެވެ.
މި މަންޒަރު ފެނި ދަރިވަރުން ބިރުން ވަރަށް ހަޅޭއްލެވި ކަމަށާއި ބައެއް ކުދިން ބިރުން މޭޒު ދޮށަށް ވަދެވެސް ތިބި ކަމަށް އެ ބެލެނިވެރިޔާ ބުންޏެވެ.