ރައީސް ޔާމީނަކީ 2013 ވަނަ އަހަރަށް އެމަނިކުފާނު ގެންގުޅުއްވި މެނިފެސްޓޯގާ ނެތް އެތައް ކަމެއް ވެރިކަމުގެ ފަސް އަހަރު ދުވަހު ކުރެއްވި ހިންގުންތެރި ވެރިއެއް ކަމަށް ޕީޕީއެމްގެ ކައުންސިލް މެމްބަރ މުހައްމަދު ހުސެއިން ޝަރީފް ( މުންދު ) ވިދާޅުވެއްޖެއެވެ.
ޕީޕީއެމުން މިރޭ ކުރިއަށް ގެންދިޔަ ޖަގަހަ ޖަލްސާގައި ވާހަކަފުޅު ދައްކަވަމުން މުންދު ވިދާޅުވީ، 2013 ރިޔާސީ އިންތިހާބުގެ މެނިފެސްޓޯގާ ރައީސް ޔާމީން ބްރިޖުގެ ވާހަކަ ނުލިއުއްވާ ނަމަވެސް އެކަން ކުރެއްވީ އެމަނިކުފާނުގެ ތަސައްވުރަށް އިތުރަށް ގެންނަވައިގެން ކަމަށެވެ.
އަދި އައު ރަންވޭ ހަދާ އެއަރޕޯޓު ބޮޑުކުރާނެ ކަންވެސް މެނިފެސްޓޯގާ ނުލިޔުއްވާ ނަމަވެސް އެކަންވެސް ކުރެއްވީ ދުރު ވިސްނޭ ތަސައްވުރުން ކަމަށް މުންދު ވިދާޅުވިއެވެ.
‘ ދަރުމަވަންތަ ހޮސްޕިޓަލް ވާހަކައެއް ރައީސްގެ މެނިފެސްޓޯގާ ނޯންނާނެ. އޭގެ މާނައަކީ ރައީސް އަކީ މެނިފެސްޓޯގައި ހުރި ކަންކަން ތަންފީޒު ކުރެއްވުމަށްފަހު އޭގެ އިތުރަށްވެސް އެތައް ކަމެއް ކުރެއްވި ބޭފުޅެކޭ’ މުންދު ވިދާޅުވިއެވެ.
އިތުރަށް ވިދާޅުވީ ރިޔާސީ އިންތިހާބު 2023 ގެ ވޯޓު ކަރުދާހުގައި އިރާދަފުޅުން ރައީސް ޔާމީންގެ ނަންފުޅު އޮންނާނެ ކަމަށާއި އެ ނޫން ގޮތަކަށް އަންނަ ރިޔާސީ އިންތިހާބު ނުބޭއްވޭނެ ކަމަށެވެ.
ނިމުނު 2018 ގެ އިންތިހާބާ ކުރިއަށް އޮތް 2023 ގެ ރިޔާސީ އިންތިހާބުހައި އެއްވެސް ތަފާތެއް ނެތް ކަމަށް މުންދު ވިދާޅުވިއެވެ.
ނަމަވެސް ސަރުކާރު ހިންގާ އެމްޑީޕީ ކޯލިޝަނުގައި ތިބި ހުރިހާ ޕާޓީއަކަށް ވެސް ރައީސް ޔާމީން ގިނި ކަންޏާ ނިކުމެވަޑައިގެން ބޮޑު އިންސައްތައެއްގެ ވޯޓު ކާމިޔާބު ކުރައްވާނެކަން ޔަގީންވާތީ ފޯމިއުލާ ބަދަލުކޮަށްގެން އިންތިހާބުގައި ވާދަކުރަން މަސައްކަތް ކުރަމުންދާ ކަމަށް މުންދު ވިދާޅުވިއެވެ.