ހަގީގީ ޑިމޮކްރަސީއަކީ ރައްޔިތުންގެ ފަރާތުން ރައްޔިތުންނަށްޓަކައި ރައްޔިތުން އެދޭ ގާނޫނީ ވެރިކަމެއް ހިންގުން ކަމަށް އިލެކްޝަންސް ކޮމިޝަނުގެ ނައިބު ރައީސް އިސްމާއިލް ހަބީބު ވިދާޅުވެއްޖެއެވެ.
ބައިނަލް އަގުވާމީ ޑިމޮކްރަސީ ދުވަހުގެ މުނާސަބަތާއި ގުޅުވައިގެން ކުރެއްވި ޓުވީޓެއްގައި ހަބީބު ވިދާޅުވީ، ޒަމާނީ ޑިމޮކްރަސީއަކީ ރައްޔިތުންގެ ބާރު ކަމަށާއި އާއު ގާނޫނު އަސާސީން ރައްޔިތުންގެ ބާރު ކަށަވަރުކޮށްދީ އަސާސީ ހައްގުތައް ވަނީ ރައްކާތެރިކޮށްދީފައި ކަމަށެވެ.
އަދި ޑިމޮކްރަސީގައި މިނިވަންކަމާއި އިންސާފުވެރިކަމާއެކު އިންތިހާބުތަކުގައި ވާދަކުރުމާއި ވޯޓުލުމުގެ ފުރުސަތު އޮންނަންޖެހޭ ކަމަށް ހަބީބު ވިދާޅުވިއެވެ.
މީގެ އިތުރުން ނޫސްވެރިންނާ ނުލައި، ޑިމޮކްރެސީއެއް ފައްކާވަމުންނެއް ނުދާނެ ކަމަށާއި ނޫސްވެރިންނަކީ ޑިމޮކްރަސީގެ ވަރަށް ޚިދުމަތްތެރި ދައުރެއް އަދާކުރާ މުހިންމު ބަޔެއް ކަމަށް ހަބީބު ވިދާޅުވިއެވެ.
