ރާއްޖޭގެ ބޮޑު ބައެއްގައި ވައި ތަގައްޔަރުވެ ޖައްވު ނުސާފުވެފައި ވާތީ ނުރައްކާތެރިކަން ކުރިމަތި ވެދާނެ ކަމަށް ބަލައި ބޭރަށް ނިކުމެ އުޅޭ އިރު ރައްކާތެރިކަމުގެ ފިޔަވަޅު އެޅުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އިލްތިމާސް ކޮށްފިއެވެ.
އެ އެޖެންސީން ބުނީ ފުއްޕާމޭގެ ބަލިތަކާއި ހިތުގެ ބަލި، އެލާޖީ މައްސަލަތައް ހުންނަ މީހުން ގެއިން ބޭރުގައި ގިނަ ވަގުތު ހޭދަ ނުކުރުމަށް އިލްތިމާސްކުރާ ކަމަށެވެ.
އަދި ބޭރަށް ނިކުންނަން ޖެހޭ ހާލަތްތަކުގައި ރައްކާތެރި މާސްކް އެޅުމާއެކު ތުއްތު ކުދިން ބޭރަށް ނުނެރުމަށް އެޗްޕީއޭގެ އިލްތިމާސްގައިވެއެވެ.
ވައި ނުސާފު ވަގުތުގައި ސަމާލުކަން ދޭންވީ ކަންކަމުގެ ތެރޭގައި ގޭގެ ދޮރުތައް ލައްޕާފައި ބެހެެއްޓުމާއި، ބޭރުގައި ކުޅިވަރު ކުޅުމާއި ކަސްރަތުކުރުން ފަދަ ކަންކަން މަޑުޖައްސާލުން ހިމެނޭ ކަމަށް އެޗްޕީއޭއިން ބުނެއެވެ.
ޖައްވު ނުސާފު ކަމަށް ފެންނަނީ ހުޅަނގުން އިރު މައްޗަށް ވައި ބަދަލުވަމުން މިދާ ދުވަސްވަރު ހިމާލަޔަން ސަރަހައްދުން ހިރަފުހާއި ދުން ވަޔާއެކު ބޭ އޮފް ބެންގަލް ހުރަސްކޮށް ރާއްޖެ އާއި ހަމައަށް ފޯރާތީ ކަމަށް މެޓުން ބުނެއެވެ.
މީގެ ސަބަބުން ހާއްސަކޮށް އުތުރާއި މެދުރާއްޖެތެރޭގެ ސަރަހައްދުތަކުގައި ވައި ނުސާފުވެ ދުރު ފެންނަ މިންވަރު ދަށްވާނެ ކަމަށްވެސް މެޓުން ބުނެއެވެ.