ހަންގޭރީގެ ހޮސްޕިޓަލެއްގައި މަސައްކަތްކުރާ އުމުރުން 30 އަހަރުގެ ފިރިހެނަކު، އިންސާނީ ގުނަވަންތައް އެއްކޮށް ގެންގުޅުނު ކަމުގެ ތުހުމަތުގައި އެ ގައުމުގެ ފުލުހުން ހައްޔަރުކޮށްފިއެވެ. ހަންގޭރީގެ ނޭޝަނަލް ބިއުރޯ އޮފް އިންވެސްޓިގޭޝަނުން ބުދަޕެސްޓްގައި މި މީހާ ހައްޔަރުކުރީ ޖޫން މަހުގެ 17 ވަނަ ދުވަހުއެވެ.
ފުލުހުން ބުނި ގޮތުގައި، ހޮސްޕިޓަލެއްގެ އޯޑަރލީއެއްގެ ވަޒީފާ އަދާކުރާ މި މީހާ ވަނީ އޭނާ މަސައްކަތްކުރާ ތަނުންނާއި ފަޅުކޮށްފައިވާ ގަބުރުސްތާނުތަކުން އިންސާނީ ގުނަވަންތައް ހޯދާފައެވެ. އޭނާ ދިރިއުޅޭ އެޕާޓްމަންޓް ބަލައި ފާސްކުރިއިރު، އިންސާނުންގެ ބޯތަކާއި، ފައިގެ ބައެއްގެ އިތުރުން އަތެއް ވެސް ވަނީ ފެނިފައެވެ. މީގެ އިތުރުން މޫނުގެ ހަންގަނޑު ބޭނުންކޮށްގެން ތައްޔާރުކޮށްފައިވާ މޫނެއްގެ ބައެއް ވެސް ފެނިފައިވާ ކަމަށް ފުލުހުން ބުނެއެވެ.
މި މައްސަލައިގެ ތަހުގީގުގައި ފުލުހުންނަށް ފެނުނު އިތުރު ތަކެތީގެ ތެރޭގައި ސޫޓްކޭހެއްގައި ރައްކާކޮށްފައި ހުރި ކަށިތަކާއި، ފުޅިއަކަށް އަޅާފައިވާ ހިތެއް ހިމެނެއެވެ. އެ ހިތަކީ އިންސާނެއްގެ ހިތެއްތޯ ނުވަތަ ޖަނަވާރެއްގެ ހިތެއްތޯ ބެލުމަށް ފޮރެންސިކް ތަހުގީގުތައް މިހާރު ދަނީ ކުރަމުންނެވެ. ފުލުހުން ތުހުމަތު ކުރާ ގޮތުގައި މި މީހާ ވަނީ ހަންގޭރީ އާއި ސްލޮވާކިއާގެ ގަބުރުސްތާނުތަކުން ގަބުރުތައް ކޮނެގެން ނަގާފައެވެ.
ސުވާލުކުރުމުގެ މަރުހަލާގައި އެ މީހާ ވަނީ އިންސާނީ ގުނަވަންތައް އެއްކުރި ކަމަށް އިއުތިރާފުވެފައެވެ. އޭނާ ބުނި ގޮތުގައި އޭނާ އަކީ އިންސާނީ ގުނަވަންތަކަށް ހާއްސަ ޝައުގުވެރިކަމެއް ހުންނަ މީހެކެވެ. އަދި އޭނާ ވަނީ ބައެއް ގުނަވަންތައް ބޭނުންކޮށްގެން ކާތަކެތި ތައްޔާރުކޮށް ކައިފައިވާ ކަމަށް ވެސް ބުނެފައެވެ. ފުލުހުން ބުނީ އޭނާއަކީ އެނަޓޮމީ އާއި ޕެތޮލޮޖީއަށް ލޯބިކުރާ، އަދި ޖަނަވާރުތައް ކޮށައި ހެދުމަށް ޝައުގުވެރިވާ މީހެއް ކަމަށެވެ.
މި މައްސަލައާ ގުޅިގެން އޭނާގެ ކޮމްޕިއުޓަރުތަކާއި، ލެޕްޓޮޕް، ޓެބްލެޓް އަދި ފޯނުތައް ފުލުހުންގެ ބެލުމުގެ ދަށަށް ވަނީ ގެންގޮސްފައެވެ. އޭނާގެ މައްޗަށް މިހާރު ކުރަމުންދަނީ އިންސާނީ ހަށިގަނޑު ގަވާއިދާ ހިލާފަށް ބޭނުންކުރުމުގެ ތުހުމަތެވެ. ފެނިފައިވާ ހުރިހާ ގުނަވަންތަކެއް ފޮރެންސިކް މާހިރުން ތަހުގީގު ކުރަމުންދާއިރު، އެ ތަކެތީގެ އަސްލު ދެނެގަނެވުމުން އޭނާގެ މައްޗަށް ކުރެވޭ ދައުވާތައް އިތުރުވުން އެކަށީގެންވާ ކަމަށް ފުލުހުން މައުލޫމާތު ދެއެވެ.